Чи ватанэгьлияр — гьар сана
Урусатдин гьар жуьре шегьеррин, районрин медидарайра гьакъисагъвилелди духтурвилин пеше кьилиз акъудзавай чи ватанэгьлийрин кьадар гзаф я. Алай вахтунда чи уьлкведин меркезда духтур-терапевт яз кIвалахзавай Теллиханум Шаировна Гьажибалаевани вини дережадин пешекарвал, алакьунар ва рикI гваз кIвалахунин тегьер къалурнавай духтур я.
Теллиханум духтурдин буба Шаир Гьажибалаев 1986-йисуз Азербайжандай Туладин областдиз куьч хьана, гьана кIвал-югъ кутуна.
Т.Гьажибалаева 1990-йисан 1-мартдиз Туладин областдин Плотицыно хуьре дидедиз хьана. 2007-йисуз Никольское-Вяземское хуьруьн мектеб куьтягьна, Орелдин областдин Мценскдин медицинадин училищедик экечIна. 2011-йисуз анаг яру дипломдалди акьалтIарна, фельдшервилин пеше къачуна.
2010-2011-йисара ада Мценскдин ЦРБ-дин садакай масадак акатдай азаррикди начагъбур сагъардай отделенида санитаркавиле кIвалахунилай вичин зегьметдин рехъ гатIунна.
Медицинадин рекьяй гегьенш чирвилер къачунихъ къаних руша кьатIана хьи, рикI алай пешедай агалкьунралди кIвалахун патал кьилин образование чарасуз я. ИкI, ам Москвадин И.М.Сеченован тIварцIихъ галай медицинадин сад лагьай госуниверситетдик экечIна. 2017-йисуз ада “духтур-сагъардайди” пешедай диплом къачуна.
Т. Гьажибалаевади 2017-2019-йисара Москвадин здравоохраненидин департаментдин А.С.Логинован тIварцIихъ галай клиникадин илимдин центрада терапиядин рекьяй ординатурада чирвилер мадни артухарна, духтур-терапевтвилин, вад вацран муддатда “ультразвуковая диагностика” пешедин курсар кIелна ва и рекьяйни духтурвилин махсус диплом къачуна.
Инсанрин сагъламвилин къаравулда акъвазунин важиблу пешедай тамам чирвилер къачурдалай кьулухъ, 2020-йисалай инихъ, Теллиханум Шаировнади Москвадин здравоохраненидин департаментдин М.Е. Жадкевичан тIварцIихъ галай шегьердин клиникадин азарханада духтур-терапевт яз зегьмет чIугвазва.
“Гьеле аял чIавалай за жувакай гележегда духтур жеда лагьана фикирзавай. Мураддив агакьун патал за и рекье лазим тир вири камар къачуна. И пеше хкягъунал зун гзаф шад я”, — лугьузва Теллиханум духтурди.
Инсанрин сагъламвилин къайгъу чIугунин жигьетдай духтуррин кьитвал арадал атай тIугъвалдин девирда Т.Гьажибалаевади чIугур зегьмет кьетIендаказ къейд авун лазим я. Коронавирусдин азарди инсанар гьелекзавай къизгъин вахтунда Теллиханумни къерехда акъвазнач. Коронавирусдихъ галаз женг чIугун патал махсус курсара пешекарвилин дережа хкажна ва гуьгъуьнлай вирусдик начагъбур сагъардай стационарда зегьмет чIугуна.
Теллиханум духтур трансфузиологиядин хиляйни шагьадатнама гвай пешекар я. Медицинадин жуьреба-жуьре хилерай чирвилер къачунватIани, къазанмишнавай агалкьунар ада бес хьанвайди яз гьисабзавач. Гьавиляй адаз гележегда аспирантурадик экечIдай къаст ава.
Духтуррин кIвалахриз къимет гудай интернетдин махсус сайтда Т.Гьажибалаевадилай разивал къалурзавай келимаяр кхьенва. Адан вини дережадин пешекарвал себеб яз, сагъ хъхьайбуру алхишар ийизва. РикI алай кIвалахда къуй адахъ мадни еке агалкьунар хьурай!
К. Ферзалиев
