Республикадин “Гьакъикъат” газетдин редакцияда пресс-конференция кьиле фена. Анал Дагъустандин военный комиссар Дайтбег Мустафаева алатай йи­сан зулуз Ватандиз къуллугъиз рекье турбурукай ва исятда — 1-апрелдилай 15-июндалди  жегьилар армиядин жергейриз тухун патал гьазурзавай гьалдикай ихтилатна.

— Алатай йисан зулун планар чна кьилиз акъудна. Россиядин Федерациядин Яракьлу Къуватриз ва Милли гвардиядин къурулушриз 3 агъзурдалай виниз жегьилар рекье туна. Абурукай 2 агъзур кьван чи шегьерра ва районра военный рекьяй пешеяр (водителар, трактористар, фельдшерар, связистар, механикар) къачунвайбур тир. Чав агакьнавай малуматрай, саки вирида намуслувилелди, зиреквилелди къуллугъзава.

Гатфариз Россиядин Яракьлу Къуватрин частара къуллугъ авунал 134 агъ­­зур жегьил желбда, — лагьана Д.Мус­та­­фаева. —  Кьиблепепатан военный округдин штабди тайинарнавайвал, Да­гъустандай РФ-дин Яракьлу Къуватриз ва Мил­ли гвардиядин жергейриз пуд агъзурдав агакьна жегьилар тухуда. Абурукай военный комиссариатдиз талукь курсара кIелна­вай­бурун, вердишвилер къачунвайбурун кьадар кьве агъзурдав агакьнава.

Республикадин военный комиссарди къейд авурвал, алай вахтунда рес­пуб­ли­када муниципальный 52 пунктуна жегьилар кьабулзава, медицинадин ко­миссия­ди абур ахтармишзава ва армиядин жергейриз рекье тваз гьазурзава. Республика­дин сборный пункт армиядиз тухузвай же­гьилриз герек къвезвай вири шейэралди (военный партал, недай-хъва­­дай шейэр, медикаментар, тIугъ­вал­­­диз акси за­тIар)­ таъминарнава. Къуллугъдай частариз агакьайла, абур кьве гьафтедин карантинда жеда. Призывникар чкайрал ага­кьардай улакьарни дезинфекция ийиз­ва.

Дайтбег Мустафаева кьилди къейд авурвал, исятда армиядин жергейриз эверзавайбуру Украинада кьиле тухузвай махсус серенжемра иштиракдач. Абуру анжах Россиядин мулкарал алай военный частара къуллугъда.

Республикадин военкоматдин вири отделенийра жегьилар армиядиз желб авунин лазим серенжемар пайгардик кваз, истемишзавай къайдада тухузва. Сад лагьай десте 20-майдиз рекье твадайвал я. Жегьил дагъустанвийри РФ-дин вири военный округра, Россиядин Милли гвардиядин ва МЧС-дин къурулушрани къуллугъда.

Нариман Ибрагьимов