1-апрелдиз РД-дин Кьил Сергей Меликова, Дагъустандин халкьдин шаир Расул Гьамзатован 100 йис тамам хьуниз талукьарна, къведай йисуз кьиле тухудай мярекатриз гьазурвал акунин месэлайриз талукьарнавай совещание кьиле тухвана.
С.Меликова, Р.Гьамзатова неинки са Дагъустандин, гьакIни вири Урусатдин эдебият вилик финик кутунвай кьетIен пай фикирда кьуна, алатай йисан гатуз уьлкведин Президент Владимир Путина “Расул Гьамзатов дидедиз хьайидалай инихъ 100 йис тамам хьун къейд авун” Указ акъуднавайди рикIел хкана. И вакъиадихъ галаз алакъалу яз, тешкиллувилин федеральный комитетни арадал гъанва.
Шаирдин юбилейдин мярекатриз гьазур хьунин жигьетдай кьиле тухузвай кIвалахрикай РД-дин Гьукуматдин Председателдин за-меститель Муслим Телякавова ихтилатна. Ада хабар гайивал, юбилейдиз талукьарна, федеральный дережада аваз кьабулнавай пландик Дагъустанда кьиле тухудай вири мярекатар кутунва. М.Телякавован гафаралди, Р.Гьамзатован юбилей къецепатан са жерге уьлквейрани (мисал яз, Иранда, Монголияда) къейддайвал я.
“Шаирдин ватан тир Хунзах районда цIийи мектеб эцигзава, рекьер туькIуьрзава, инфраструктурадин маса объектар кардик кутазва”, — алава хъувуна республикадин вице-премьерди.
Сергей Меликова Дагъустан патал Р.Гьамзатован юбилей лишанлу вакъиайрикай сад ва адаз гьазурвилер акунин кIвалахрив жавабдарвилелди эгечIун герек тирди къейдна.
«Лезги газет»
