Гьуьрметлуди хьиз, муаллимдин кIвалах четинди, гьа са вахтунда жавабдардини я. Сифтегьан классрин муаллимдин кIвалах мадни четинди я. Сифте яз школадиз къвезвай аялдиз гьарфар, рекъемар кхьиз, кIелиз чирзавайди сифтегьан классрин муаллим я. Гьавиляй школаяр акьалтIарунин мярекатрал выпускникри чпиз эвелдай тарсар гайи муаллимрин тIварар еке гьуьрметдивди кьазва, абуруз цуьквер, пишкешар гузва.
Эминхуьруьн Абдул Саидован тIварунихъ галай юкьван школадин сифтегьан классрин муаллим Залина Жавидиновна Исмаиловадикай газетдиз макъала кхьин завай 1-классда кIелзавай аялрин диде-бубайри тIалабна. Ам руководитель тир классда зи хтул Юсуфани кIелзава. Залина Жавидиновна вичин пешедал, аялрал рикI алай, вирида гьуьрметзавай муаллим я.
З.Исмаиловади хайи хуьруьн юкьван школа, 2000-йисуз Гь.Б.Къазиагьмедован тIварунихъ галай Дербент шегьердин педагогический колледж хъсан къиметар аваз акьалтIарна. Зегьметдин рехъ хайи хуьруьн школада сифтегьан классрин муаллимвиле кIвалахунилай башламишна.
2005-йисуз З.Исмаилова кьадар-кьисметди Санкт-Петербург шегьердиз акъудна. Хъсан чирвилер, кьатIунар авай лезги руша Санкт-Петербургдин “Зингер” компаниядин ктабрин кIвале кьилин пешекар яз 2019-йисалди кIвалахна. Грамотайри ва сертификатри шагьидвал ийизвайвал, везифаяр ада намуслудаказ кьилиз акъудна.
З.Исмаиловадихъ менеджервилин дипломни ава. 2019-йисалай Залина Жавидиновна Эминхуьруьн юкьван школада муаллимвилин кIвалахдив эгечI хъувуна. Ам руководитель тир 1-классда 19 аялди кIелзава. Абуруз кIел-кхьин чирунин карда муаллимди намуслудаказ зегьмет чIугвазва. Аялри фасагьатдаказ ктабар кIелзава, гафар, рекъемар кхьизва.
— Залина Жавидиновна неинки чи школада, санлай районда сифтегьан классрин лап хъсан муаллимрикай сад я, — лугьузва школадин директордин заместитель Р.Рамазановади. — Аялрин чирвилерин дережа, кьатIунар ва зигьин хкажун патал ада тарсара кIвенкIвечи къайдайрикай, таблицайрикай ва аквадай агитациядин маса такьатрикай менфят къачузва. Гьавиляй Залина муаллимдихъ кIвалахда агалкьунарни жезва. Школадин руководство ва аялрин диде-бубаяр адан кIвалахдилай гзаф рази я.
З.Исмаиловадин намуслу зегьмет райондин образованидин управлениди ва школадин дирекцияди са шумудра гьуьрметдин грамотаяр ва пишкешар гуналди къейднава.
Залина Жавидиновнади гьисабзавайвал, вичи тарсар гузвай аялрикай, абурун гележегдикай фикирзавай гьар са муаллимди вичин чирвилер гьамиша артухарун лазим я. И кар З.Исмаиловади вичин чешнедалди субутзава: алай вахтунда ада заочнидаказ Дагъустандин госуниверситетда кIелзава.
Гьа са вахтунда, З.Исмаиловади школадин общественный уьмуьрдани активвилелди иштиракзава.
Хазран Кьасумов