Алатай гьафтеда Дагъустан Республикадин “Хайи чIалан виридалайни хъсан муаллим — 2022” конкурсдин нетижаяр кьуна. Конкурсдин эхиримжи пай Махачкъала шегьердин 11-нумрадин гимназияда кьиле фена.
РикIел хкин, конкурсдин иштиракчийри са шумуд паюна акъажунарна. Заочный паюниз Дагъустандин районрай 50 муаллимдилай арза атана.
Конкурсдин гъалибчи Гуниб райондин Агъа Кегердин мектебдин авар чIалан муаллим Рамазан Гъазимегьамедовакай хьана. Кьвед лагьай чка Махачкъаладин 27-нумрадин мектебдин авар чIалан муаллим Наида Мегьамедовади кьуна. Пуд лагьай чкадиз пуд муаллим лайихлу хьана: Буйнакский райондин Атланаулдин гимназиядин къумукь чIалан муаллим Саида Алхасова, Хасавюртдин 15-нумрадин мектебдин чечен чIалан муаллим Тоират Хуцурова ва Каспийскдин 6-нумрадин мектебдин дарги чIалан муаллим Хадижат Алибагьмудова. Гъалиб хьайи муаллимриз РД-дин образованидин ва илимдин министерстводин дипломарни къиметлу пишкешар гана. Конкурсдин гъалибчиди “Вирироссиядин хайи чIаларин муаллимрин мастер-класс” конкурсда иштиракда.
«Лезги газет»