Уьмуьр виликди финихъ галаз сад хьиз, цIийивилерни арадал къвезва. ИкI, Россиядин Президент Владимир Путина гьар йисуз кьиле тухузвай “Ачух линияда” теклифуналди, алатай йисан 1-сентябрдилай (чи уьлкведин 14 йисалай 22 йисал кьван яшара авай) 13 миллион касди чпин балансда 3000 манат пул авай “Пушкинан картаяр” къачуна. Уьмуьрдиз кечирмишзавай и программадин сергьятра аваз и пул, малум тирвал, жегьилривай анжах культурадин программайра харж ийиз жеда.
Мукьвара СтIал Сулейманан райондин умуми образованидин са шумуд школада кIелзавай 300-далай виниз аялар Кьасумхуьрел И.Гь.Тагьирован тIварунихъ галай культурадин дараматда, “Пушкинан картадикай” менфят къачуналди, лезгийрин СтIал Сулейманан тIварунихъ галай музыкадинни драммадин театрдин артистри къалурай “Дахдин цIийи свас” тамашадиз килигна.
Райондин образованидин управленидин начальник Гьуьсейн Шихбабаева чаз лагьайвал, хуьрерин школайрин регьберри школьникар Кьасумхуьрел гъунин ва хутахунин кIвалах хъсандиз тешкилнавай.
Жегьил тамашачийриз бул хъуьруьнар, шад манияр квай тамаша ва театрдин артистри тамамарай ролар гзаф бегенмиш хьана.
Гаф кватай чкадал лугьун хьи, театрдин артистри “Дахдин цIийи свас” тамаша райондин винидихъ тIвар кьунвай дараматда чIехи яшарин инсанризни къалурна. Адаз тамашиз райадминистрациядин, гьакIни маса организацийрин векиларни атанвай.
Мугьман хьунай, итижлу тамаша къалурунай гьам мектебра кIелзавай аялри, гьамни чIехи яшарин тамашачийри артистриз чухсагъул лагьана.
Мадни къейд ийиз кIанзава хьи, “Пушкинан картадай” са тIимил вахтар идалай вилик райондин школайра кIелзавай 200-далай виниз аялар СтIал Сулейманан музейдиз, 50-далай гзафбур Кьурагьрин тарихдинни край чирдайбурун музейдиз, Чуьхверхуьруьн юкьван школада кIелзавай 18 аял Дагъустандин Огни ва Дербент шегьерриз экскурсиядиз фенай.
Мадни са алава: 2022-йисалай “Пушкинан картадиз” 5000 манат пул язава. Картадикай Россиядин вири регионра менфят къачуз жеда.
Хазран Кьасумов
