Футболдай Дагъустандин кубокдин финалдин сергьятра аваз “Ахцагь” “Судостроителдихъ” (Махачкъала) галаз къугъвана. Ахцегьа кьиле фейи и къугъуниз килигиз райондин кьил Осман Абдулкеримов, администрациядин къуллугъчияр, районэгьлияр, къунши хуьрерайни футболдал рикI алайбур атанвай.
Кьве командади чпин бягьс башламишдалди вилик Ахцегьа райсобранидин, райадминистрациядин, финансрин управленидин векилар республикада и вацран эхирра кьуршахар кьунай кьиле фидай Европадин чемпионатдин къаршида Дагъустанда тешкилнавай флешмобдик экечIна. Абуру чи республика патал им спортдин гьакъикъи сувар жедайди къейдна ва чемпионатдин иштиракчийризни тамашачийриз Дагъустандиз атун теклифна.
Осман Абдулкеримова райондин векилар, иллаки жегьилар, чемпионатдин сергьятра аваз, мугьманар кьабулиз гьазур тирди къейдна. Футбол къугъваз Махачкъаладин командани къадим Ахцегьрин чилел атун тебрикайдалай кьулухъ ада футболистривай михьи къугъун тIалабна ва гужлубур гъалиб хьун шартI тирди лагьана.
Флешмобдин сергьятра аваз “Буюр Дагъустандиз” ва маса келимаяр алай чарар гваз шикилар ягъайдалай кьулухъ футболдин майдандал Алла Жалиловадин тIварунихъ галай искусствойрин школадин ва Ахцегьрин 1-нумрадин школадин аялрин гьевескар коллективри кьуьлерна, манияр лагьана.
11-апрель. Къугъун башламишна. Туп гагь са, гагь маса командадин варарин вилик ква, футболистри ам патал женг тухузва, мад ва мад сеферда туп цава аквазва. Гьа икI, сад-садан гуьгъуьналлаз “Судостроителдин” варариз Атем Мирзоева пуд ва Абдул Юсуфова са туп яна. Майдандин иесийрин вараризни пуд туп фена. Къугъун 4:3 гьисабдалди “Ахцагь” командадин хийирдиз акьалтIна.
Къугъуна Атем Мирзоев ва “Судостроителдин” векил, пуд туп ягъай Темирхан Талибов тафаватлу хьана. Абуруз спонсоррин — Ахцегьрин ДЮСШ-да спортдал машгъул хьайи Мегьамед Алишеван ва Дагтехкадастрдин директор Шамил Алиеван патай кубокарни призар гана.
15-апрелдиз гьа и командайрин арада кьиле фейи къугъуна “Ахцагь” команда 5:1 гьисабдалди кумукьна.
Дагъви Шериф
