Россиядин Президент Владимир Путина санкцийрин шартIара налогрин жигьетдай куьмек гунин кризисдиз акси серенжемриз талукь цIийи къанундал къул чIугуна. Талукь документ и йикъара правовой информациядин сайтда чапнава.
ЦIийи къанунди, кьилди къачуртIа, ихьтин месэлаяр фикирда кьунва:
— 2021-2023-йисара материалдин менфят яз Россиядин банкарай къачунвай доходрилай къвезвай налогдикай (НДФЛ) азадда;
— реорганизациядин (тергунин) процессда авай ва банкротвал тестикьар тавунвай тешкилатривай арза гунин къайдада НДС-дин эвездин такьатар вахчуз жеда;
— Улакьрин налогрин жигьетдай хкажнавай коэффициент анжах 10 миллиондилай виниз къимет авай автомобилриз талукь яз кардик жеда;
— IT-компанияр патал 2022-2024-йисара къазанжидал къвезвай налогдин кьадар 0 % жеда. Исятда и налог 3 процентдикай ибарат я.
Къейд ийин, идалай вилик Президент В.Путина яшамиш хьунин агъа кIанин кьадар, зегьметдин гьакъи-дин агъа кIанин кьадар (МРОТ), бюджетникрин мажибар ва яшайишдин вири такьатар, пенсияр артухарунин тапшуругъ ганай. Уьлкведин регьберди тестикьарайвал, къейднавай гьакъияр гун патал бюджетда бес кьадарда такьатар ава.
«Лезги газет»
