Галаго

Шикилдай аквазвайди Африкадин гъвечIи маймунрин жуьрейрикай сад я. Адаз галаго лугьузва. Са бязи чешмейри тестикьарзавайвал, Африкадин чIехи вири тамара и маймунар яшамиш жезва. Мадни абур кул-кусар авай гегьенш чкайра, тамарин къерехра, вацIарин кьерера жедай аскIан тарар авай чкайра гьалтда.

Галагодин хамунин ранг шуьтруьвални рехивал какахьай хьтинди,  кIвачер хъипи тав квайбур я. И гьайванар тарара яшамиш жеда, абурулай яргъа мензилдиз хъсандиз хкадариз алакьда. Тарарай эвичIна, гагь абур кьве кIвачел, гагь пуд кIвачел къекъведа.

Итижлу делил ам я хьи, цацар авай чкайра гьерекатдик квайла, галагодилай вичин япар турба хьиз кIватIиз алакьзава. Ихьтин кьетIен алакьуни адаз еке япар тараринни кул-кусрин хилерикайни цацарикай хуьз куьмекзава.

Галагояр асул гьисабдай йифен гьайванар я. Адет яз, абур кьилди-кьилди яшамиш жеда, тек-туьк дуьшуьшра гапIалриз кIватI жеда.  ТIуьнин еринда и маймунри гзафни-гзаф гьашаратар ва тарарин мижеяр ишлемишда.

Африкадин и вагьши бязибуру кIвалин гьайван хьиз вердишарнава. Галагодин бедендин яргъивилел 13-21 сантиметр жеда, тумунин яргъивилел – 20-30 сантиметр. Заланвал тахминан 300 граммдив агакьда.

ТIебиатда галагояр 8 йисуз кьван яшамиш жезва. Гьа са вахтунда кIвалин хъсан шартIара, лазим къайдада тIуьн тешкилайтIа, и вагьшийрин уьмуьр 20 йисал кьван давам жеда.

«Лезги газет»