1941-йисан 22 июнь Къалажух хуьруьн жемятдин рикIени чIулав югъ яз амукьда. Дяве башламиш хьайи сифте йикъарилай шегьерра, хуьрерин чкайра жемятри митингар тухуник кьил кутуна, чеб Ватан душмандикай хуьз гьазур тирдакай малумариз хьана. Къалажухдални ВЛКСМ-дин Докъузпара райкомдин секретарь, гьа и хуьруьнви Мамедкеримов Пирали хтана, ада фронтда авай гьаларикай гегьенш ихтилат авуна.
Собранидал сад-садан гуьгъуьналлаз комсомолдин активистри чеб гуьгьуьллувилелди фронтдиз фидайди лагьана. Абурукай сад Примов Жанлат тир.
Ам 1921-йисан 1-январдиз Къалажух хуьре лежбердин хизанда дидедиз хьана. Ина ирид йисан мектеб, гуьгъуьнлай Буйнакск шегьердин педучилище кутягьай ада са йисуз хуьруьн мектебда аялриз урус чIалан тарсар гана. Фронтдиз фейила, ада Дондин казакрин кавалериядин 11-дивизиядин 39-полкуна къуллугъна, Кавказ, Донбасс азаддай, Днестр вацIалай элячIдай женгера иштиракна. Днестр вацIун къерехда авай са хуьр азаддай йифен ягъунра адал залан хер хьана, тамам пуд вацра Алма-Атадин, Москвадин госпиталра сагъар хъувурдалай къулухъ ам мад фронтдиз хъфена. Дивизиядихъ галаз Румыния ва Венгрия азаддай женгера иштиракна. Яргъалди гуьзлемишай гъалибвилин югъ Венгриядин меркез Будапешт шегьерда къаршиламишна. Дяведа къалурай викIегьвилерай Примов Жанлатаз Ватандин дяведин I лагьай дережадин, гьакIни Яру Гъетрен кьве орден, 8 медаль гана. Взводдин командир лейтенант Примов Жанлат 1946-йисан июндиз армиядай хтана. Азербайжандин госуниверситетдин юридический факультет акьалтIарай йисуз Примов Жанлата сифте Кьурагь райондин, ахпа Хив, Кьасумхуьруьн районрин прокурорвиле, гуьгъуьнин йисара Дербент райондин прокурордин чIехи куьмекчи яз ва Мегьарамдхуьруьн райондин прокуратурадин чIехи силисчивиле кIвалахна, тамам 35-йисуз прокуратурадин органра къуллугъна.
Примов Жанлат дяведин, партиядин ва зегьметдин ветеран тир. Дагъустандин прокуратуради адан кIвалах гзаф шабагьар гуналди ва чухсагъулар малумаруналди къейдна. Уьмуьрдин юлдаш Сардарова Ядгарахъ галаз вад гадани кьве руш тербияламишна. Вирибуруз кьилин образование къачудай шартIар яратмишна. Пенсиядиз экъечIайлани, Примов Жанлата райондин ва республикадин общественно-политический уьмуьрда иштиракна.
Ишреф Жаватов
