Алай йисуз Дагъустанда имам Шамил дидедиз хьайидалай инихъ 225 йис тамам хьуниз талукьарнавай са жерге мярекатар кьиле фида. Чаз малум хьайивал, и кардиз талукь яз республикада гьукуматдин дережада аваз махсус план туькIуьрнава.
Алатай гьафтеда “Лезги газетдин” редакциядиз имам Шамилан тIварунихъ галай фондунин президент Алиасгьаб Хархачаев ва адан заместитель Седредин Жафаров мугьман хьанвай. Коллективдихъ галаз кьиле фейи гуьруьшдал абуру ихтилат физвай лишанлу вакъиадихъ галаз алакъалу яз Кьиблепатан Дагъустанда тешкилзавай мярекатрикайни ихтилатна.
— Дагъустандин вири имамрин муаллим, насигьатчи, дагъвийрин руьгьдин буба Ярагъ Мегьамед тир, — рикIел хкана А.Хархачаева. — Ада Шамилан уьмуьрда иллаки кьетIен чка кьунва. Садра кьванни Ярагъ Мегьамедан вязерихъ яб акалай кас Исламдин пеленгдиз элкъведа ва душмандихъ галаз кьиле физвай женгера ам магълуб жедач, — лагьанай имам Шамила чIехи шейхдикай. Гьакъикъатдани, Ярагъ Мегьамед себеб яз, адан хайи хуьр дуьньядин жуьреба-жуьре пипIерай инсанар кIватI жезвай зияратдиз элкъвенай. Абурун виридан мурад, къаст шейхдивай чирвилер къачун тир. Гьавиляй Шамилан 225 йис тамам хьунин сергьятра аваз жуьреба-жуьре конференцияр, элкъвей столар тешкилунихъ галаз санал Мегьарамдхуьруьн райондин Ярагърин хуьре Къуръан кIелдайбурун арада республикадин дережада аваз чIехи конкурс тухудай ниятни ава, — хабар гана А.Хархачаева.
Седредин Жафарова имам Шамила Кавказдин дяведа къугъвай роль, адан регьбервилин, тешкилатчивилин алакьунар къейдна. Ада гьакIни имамдин наибрин арада гзаф кьадар лезгиярни хьайиди рикIел хкана ва редакциядин коллективдиз абурукай газетдиз макъалаяр кхьинин теклиф гана.
Гуьруьшдин эхирдай «Лезги газетдин» кьилин редактор Мегьамед Ибрагьимова мугьманриз сагърай лагьана, ихтилат физвай вакъиадихъ Дагъустандин халкьарин арада дуствал мадни мягькемарунин жигьетдай чIехи метлеб авайди къейдна.
Чи мухбир
