Духтурриз агьалийрин арада вири девирра гьуьрмет хьайиди, авайди я. Абуру инсанрин сагъламвал хуьн ва мягькемарун патал еке зегьмет чIугвазва. Коронавирус, стIалжем ва пис маса азарар акъатнавай, сагъламвал, уьмуьр хаталувилик кутунвай алай вахтунда чун духтурриз мадни еке гьуьрметдивди килигзава, гзафбуруз духтурвилин пешедин къадирни чир хьанва…
Шегьерра, районрин центраяр тир ва маса чIехи хуьрера вири жуьредин къулайвилер авай больницайра, амбулаторийра кIвалахзавайбуруз, гьикьван лагьайтIани, регьят я. ГъвечIи, чебни райцентрайривай яргъа авай хуьрера кIвалахзавай медработникриз бегьем шартIар, мумкинвилер авачирди виридаз чида. СтIал Сулейманан райондин Агъа Хъартасрин хуьрни райцентрадивай яргъа, дагъдин ценерив гвай участокда, ава. Ина фельдшервилин пункт кардик ква. Чи суьгьбетни и хуьруьн ФП-дин заведующий Мусаева Зарема Султановнадикай я.
Алатай асирдин 60-70-йисара виликан Советрин Союздин саки вири республикайра лезгияр яшамиш жезвай, гьа гьисабдай яз Туьркменистандани тамам лезги хуьрер авай. Зарема 1972-йисуз Туьркменистандин Челекен шегьерда, гъетягъви Султанан хизанда, дидедиз хьана. Султана къенепатан крарин органра милициядин капитан, адан уьмуьрдин юлдаш Райгьаната заводда оператор яз кIвалахзавай. Абуру хизанда 4 рушни са хва чIехи авуна, уьмуьрдин шегьредал акъудна.
— Вахарини стхади чпиз маса пешеяр хкяна, — лугьузва Зарема Султановнади. — Зи рикIе гъвечIи чIавалай духтур хьунин мурад авай. И кардиз диде-бубани акси тушир, абуру и пешедин иесийриз рикIин сидкьидай гьуьрметзавай. Чи къуншидални духтуррин лезги хизан яшамиш жезвай.
1987-йисуз Челекен шегьердин юкьван школада 8-класс вири предметрай “5” къиметар аваз акьалтIарай лезги руш, рикIе авай мурад кьилиз акъудун патал Къазахстандин ЦIийи Уьзень шегьердин медучилищедик экечIна. 1990-йисуз анаг акьалтIарай жегьил пешекар, Шевченко шегьердин аялрин центральный больницадиз рекье туна, ина хирургиядин отделенида медсестра яз кIвалахна. Гуьгъуьнлай Заремади Челекен шегьердин больницада садакай масадак акатдай азаррин ва “тади куьмекдин” отделенийра намуслудаказ зегьмет чIугуна.
1994-йисуз Зарема Султановна хизандихъ галаз хуьруьз хтана. 2007-йисуз хуьруьнви Анвар Абдулкъадировичахъ галаз сирер сад авуна, хизан кутуна.
2007-йисалай инихъ, чна винидихъ лагьайвал, З.Мусаевади Агъа Хъартасрин фельдшервилин пунктуна заведующийвиле кIвалахзава.
Лагьана кIанда хьи, Зарема Султановна хуьре медицинадин рекьяй тек са пешекар я. Ада 164 касдиз медицинадин рекьяй къуллугъзава. Герек хьайила, акушервилин, фельдшервилин, аялрин духтурвилин везифаярни кьиле тухузва. Хуьруьнвийри лугьузвайвал, Зарема Султановна герек чIавуз эверай гьай я.
Сир туш, вири дуьнья къарсурай коронавирусди медработникрин къайгъуяр артухарна. Азар пайда хьайи, адан къурхулувал чIехиди тир сифтегьан вахтара Зарема духтурди, кIвалба-кIвал къекъвез, агьалийрин арада Роспотребнадзордин истемишунрикай, ковиддин хаталувиликай гъавурда тунин кIвалах тухвана, хуьруьнвийриз азардиз акси рапар ягъуниз эвер гана. Шаксуз, и вири къайгъуйри садни-кьвед ажалдин къармахрай акъуднач… Азарлу хьайибур райондин центральный больницада, кьезил жуьреда азарлу хьайи ксарни кIвалера, духтурдин гуьзчивилик кваз, сагъар хъувуна.
Зарема Мусаева пуд веледдин дидени я. ЧIехи руш Алинади, Каспийск шегьердин медучилище акьалтIарна, алай вахтунда Санкт-Петербург шегьердин са больницада акушерка яз кIвалахзава. Кьвед лагьай руш Наиляди Ставрополдин медучилищеда 2-курсуна кIелзава. 7-классда кIелзавай гада Давидахъни духтур жедай къаст ава. Аялри пудани дидедин баркаллу зегьметдин рехъ хкягъуни тестикьарзавайвал, Зарема Султановна веледриз чешне я.
— Фельдшервилин пункт дарманралди, герек маса шейэралдини таъмин я, — суьгьбетзава Зарема Султановнади. — И жигьетдай чаз райондин центральный больницади ва Уллу-Гъетягърин врачебный амбулаторияди куьмекар гузва.
Агьалийрин сагъламвал хуьнин къуллугъда намуслудаказ зегьмет чIугвазвай Зарема Султановнадиз хуьруьнвийрин арада лайихлу гьуьрмет ава. Сагърай вич!
Хазран Кьасумов
