МискIин тек са ибадатар ийизвай чка туш, ам эдебдихъ, къенивилихъ, гьуьрметдихъ эвер гузвай макан я лагьайтIани жеда. Виликдай дагъвийрин арада мискIинрин имамрихъ еке кесер авай, са кар ийидайла, абурал алукьзавай, меслятар къачузвай. Хуьруьн, халкьдин умуми месэлаяр гьялун, веревирд авун патал жемят мискIинра кIватI жедай… Девирар дегиш хьана, идахъ галаз санал жемиятдани хейлин дегишвилер кьиле фена. Амма мискIинри, жуьреба-жуьре имтигьанар ацалтнатIани, халкьдин арада чпин чка хвена.
Кьурагь райондин КIирийрин хуьруьн жуьмя-мискIин Дагъустанда Советрин гьукум тестикь хьайи йисара гамар храдай фабрикадиз элкъуьрнай. Дараматдин сад лагьай мертебада кинояр къалурдай клуб кардик кутунай. Уьлкведа дин къадагъа авунвайтIани, рикIе иман авай дагъвийри чпин кIвалера Аллагьдиз ибадат авун давамарнай.
Советрин уьлкве чкIайла, фабрикаяр, заводар, совхозарни колхозар, хейлин маса карханаяр агал хьана. Абурукай гзафбурун дараматар кьилдин ксарин хсусиятриз, бязибур лагьайтIа, тапIарар алай харапIайриз элкъвена.
Фабрика агал хьайидалай гуьгъуьниз КIирийрин хуьруьн мискIиндай мад азан гуз эгечI хъувуна.
Мукьвара чкадин агьалияр мискIиндин дарамат цIийикIа туькIуьр хъийиз эгечIна. Хуьруьн имам Рамазан Бугаеван гафаралди, ина, полдилай эгечIна, вири дегишзава: сувагъар, рак-дакIар, къав ва икI мад. Гьелбетда, и крариз пулдин такьатар ахъайзавай тайин са чешме авач: вири кIвалахар асул гьисабдай мергьяматлу инсанри садакьа яз гузвай пулдин такьатрихъ тамамарзава. Алай вахтунда ремонтдин бязи кIвалахар тамамарнаватIани, вилик хейлин крар кума.
МискIин Аллагьдин кIвал я. МискIин эцигуник чпин пай кутазвайбуруз еке сувабар жезвайди хейлин гьадисрини тестикьарзава. КIирийрин хуьруьн мискIин цIийикIа туькIуьр хъувуник пай кутаз кIанзавай ватанэгьлийривай садакьадин такьатар Сбербанкдин картадин 4817 7601 8178 3311 нумрадиз рекье тваз жеда. Картадихъ галкIурнавай телефондин нумра — 8967 938-82-85
Суалар пайда хьайитIани, гьа и нумрадиз зенг ийиз жеда.
Чи мухбир
