— Яшар хьанвай гзаф инсанрин зигьин зайиф жеда. И кардин себебни кьилин мефтIедин дамарра иви дуьз къекъуьн тавун я. Алимри тестикьарзавайвал, алай девирда инсультар, инфарктар неинки яшлу инсанриз, гьакI жегьилризни, иллаки итимриз жезва. И азаррин вилик пад кьун патал сифтени-сифте кьилин мефтIедин дамарар холестериндикай михьун лазим я. Агъадихъ халкьдин медицинадин са шумуд рецепт гузва.
— Са еке кьил серг михьна, силихар регъвена, арадал атай къаришмадиз са истикан набататдин гъери яна, банкадиз вегьена, пуд юкъуз кIвалин чимивиле мичIи чкада эцигда.
Ахпа ам куьзна, холодильникда хуьда. Пуд вацран вахтунда гьар юкъуз пуд сеферда, фу нез 30 декьикьа амайла, чайдин са тIуруна авай къаришмадиз лимондин гьакьван миже яна, ишлемишда.
— 200 г серг михьна, як регъведай машиндай авадарна, 200 мл михьи спирт яна, 10 юкъуз къайи ва мичIи чкада ара-ара юзуриз, эцигда. Ахпа ам куьзна, шуьшедин банкадиз вегьена, 1/3 истиканда авай некIедиз са шумуд стIал яна, фу недалди вилик ишлемишда.
— Ракьай янавай 100г хрендин дувулрал як регъведай машиндай авадарнавай пуд лимон ва хуьрекдин пуд тIуруна авай вирт алава хъувуна, пуд гьафтеда холодильникда хуьда. Ахпа фу недайла, йикъа кьве сеферда чайдин са тIуруна авайди ишлемишда.
“Айболит” газетдай.
Гьазурайди — Надият Велиева
