20-мартдиз СтIал Сулейманан районда, лезги чIаланни эдебиятдин олимпиададилай гъейри, математикадайни олимпиада кьиле фена. Кьасумхуьруьн 2-нумрадин юкьван мектебда тешкилай и мярекатда Кьурагь, Хив, Докъузпара ва СтIал Сулейманан районрин мектебра 10-11-классра кIелзавай 42 аялди иштиракна.
КIвалахриз къимет гузвай жюридик ДГУ-дин математикадин ва компьютеррин илимрин факультетдин декан Амучи Якьубов, физикадинни математикадин илимрин кандидатар тир Ветлугин Бейбалаев, Темирлан Ибавов ва образованидин “Надежда” центрадин директор Гьабибула Гьабибулаев квай.
10-классра кIелзавайбурун арада 1-чка — СтIал Сулейманан райондин ЦIийихуьруьн мектебдин ученик Шамил Тагьирова (пулдин пишкеш — 20 агъзур манат), 2-чка — Кьасумхуьруьн 2-нумрадин юкьван мектебдин ученик Максим Селимова (15 агъзур манат) ва 3-чка Курхуьруьн 2-нумрадин юкьван мектебдин ученик Мирим Эмирханова (10 агъзур манат) кьуна.
11-классра кIелзавайбурун арада 1-чкадиз — Докъузпара райондин Усугъчайдин юкьван мектебдин ученица Амира Саидова (пулдин пишкеш — 25 агъзур манат), 2-чкадиз — Кьурагь райондин КIирийрин хуьруьн юкьван мектебдин ученик Рамазан Тагъибегов (20 агъзур манат) ва 3-чкадиз СтIал Сулейманан райондин Агъа СтIалрин юкьван мектебдин ученица Фейзибани Муртузалиева (15 агъзур манат) лайихлу хьана. Гъалибчийриз гьакIни грамотаяр ва къиметлу пишкешарни гана.
25, 20, 15, 10 агъзур манатдин кьадарда аваз пулдин пишкешар олимпиадада кIвенкIвечи чкаяр кьур аялриз математикадай чирвилер гузвай муаллимривни вахкана.
Олимпиададин тешкилатчи Фируза Назимовна Керимовади арадал гъанвай мергьяматлувилин “Иман” фонд тир.
Чи мухбир
