РФ-дин гьукуматди бейкарвилин вилик пад кьун ва зегьметдин базардиз куьмек гун патал уьлкведин регионриз 40 млрд манат пул чара ийида. Кьилди къачуртIа, Дагъустандиз 400 млн манат ахъайда.
Такьатрин чIехи пай кIвалахдикай магьрум хьунин хаталувилик акатнавайбур патал вахтуналди зегьмет чIугвадай чкаяр арадал гъуниз ва зегьметдин биржада регистрация авунвайбур патал гьакъи гудай общественный кIвалахар тешкилуниз харжда.
Идалайни гъейри, и такьатрикай промышленностдин карханайра зегьмет чIугвазвайбурун пешекарвал хкажун патал кьабулнавай программаяр кьилиз акъудуниз ва абуру алава образование къачуниз ахъайда. Мадни и пулунин гьисабдай коммерциядинбур тушир карханаяр патал грантар тайинарда.
РФ-дин Гьукуматдин Председатель Михаил Мишустина къейд авурвал, зегьметдин базардиз ва арадал атанвай гьалара уьлкведин агьалияр кIвалахдай чкайралди таъминаруниз идалай кьулухъни пулдин такьатар чара ийида.
«Лезги газет»
