РД-дин Кьил Сергей Меликован Указдалди Дагъустан Республикадин информациядин ва печатдин Агентстводин кьиле Абдуразакь Абдулвагьабович Жамалутдинов тайинарнава.
Икьван чIавалди ада РД-дин информациядин ва печатдин министрдин советникдин везифаяр тамамарзавай. Жуьреба-жуьре йисара А.Жамалутдинова гъвечIи ва юкьван карчивал вилик тухудай Комитетда, РД-дин транспортдин, энергетикадин ва алакъадин министерствода кIвалахна, юридический “Легат” центрадиз регьбервал гана.
Республикадин “Мирмол” интернет-изданидиз ганвай интервьюда А.Жамалутдинова къейд авурвал, вичи регьбервал гузвай ведомстводин вилик акъвазнавай сад лагьай месэла СМИ-рин работникрин зегьметдин шартIар хъсанарун я.
“Алай вахтунда государстводин СМИ-ра кIвалахзавайбуруз къвезвай мажибар, гьакъикъатдани, екебур туш. Зи фикирдалди, гьа и делилди республикадин изданийрин редакцийриз алакьунар авай журналистар, пешекарар атуниз манийвал гузва. Зегьмет чIугунай лайихлу гьакъи гунин месэла гьялайдалай кьулухъ кьилин редакторризни журналистривай хъсан еридин макъалаяр истемишдай мумкинвал жеда. За гьисабзавайвал, гьар са журналистдин кIвалах кьилдин ва садалайни аслу туширди хьун герек я. И дуьшуьшда вири жавабдарвал кьилин редактордин хиве ава. Зи везифа лагьайтIа, яратмишдай коллективриз кIвалахдин рекьяй къулай шартIар арадал гъун я”, — лагьана А.Жамалутдинова.
«Лезги газет»
