Россиядин Федерациядин Президентдин тапшуругъдалди Дагъустан Республикадин Кьил Сергей Меликова 22-мартдиз агьалияр кьабулна. Республикадин регьбердин патав атанвай инсанрик секинсузвал кутазвай дердийрик рекьер къайдадиз гъунин месэлани квай.
Махачкъала шегьердин Семендер поселокдин агьали Рустам Хабчабова цIийи микрорайонда яшамиш жезвай вири агьалийрин патахъай Пирамидальная куьче ремонт авуна кIанзавайдакай малумат гана. Шегьердин талукь къуллугъди гьеле вад йис идалай вилик куьче рекьер ремонт авунин ва къайдадиз гъунин 2019-2020-йисан программадик кутун хиве кьурдакай, амма гилани гафар гьа гафар яз амайдакай лагьана.
“И месэла гьялун патал муниципалитетди тади гьалда алай йисан бюджетдик герек дегишвилер кухтун лазим я. Июндалди проектдинни сметадин документар гьазурна ва зулун варцара куьче цIийикIа туькIуьр хъувуна кIанда”,- лагьана Сергей Меликова меркездин мэр Салман Дадаеваз.
Махачкъаладин администрациядин кьили хиве кьуна хьи, алай йисан октябрдин вацралди Семендер поселокдин куьче ремонт авуна куьтягьда.
И важиблу кар уьмуьрдиз кечирмишзавай гьалдал РД-дин талукь министерстводи ва РД-да авай федеральный кьилин инспекторди гуьзчивалда.
Хунзах райондик акатзавай мулкунай физвай Обода-Гортколо-Гозолоколо рехъ капитальнидаказ ремонт авунин гьакъиндай чкадин агьалийрин патахъай Умар Дибирдадаева лагьана. Вад километрдин мензилдин ре-кьи неинки 1300 агьали яшамиш жезвай хуьрер сад-садахъ галаз алакъалу ийизва, ада гьакI районда туризм вилик тухунизни куьмек гуда. Чиргъ вегьенвай рехъ республикадин метлеб авай Грозный-Ботлих-Хунзах-Аракан шегьредихъ галазни алакъалу жезва ва ада винидихъ тIвар кьунвай хуьрерин агьалийриз райондин центр тир Хунзахиз регьятдиз фидай мумкинвални гузва.
РД-дин транспортдин ва рекьерин майишатдин министр Жамбулат Салавова къейд авурвал, “Республикадин, муниципалитетрин уртах ва чкадин метлеб авай рекьер вилик тухунин” госпрограммадин сергьятра аваз и рекьиз талукь проектдинни сметадин документар 2023-йисуз гьазурда ва рекье асфальтни твада.
Сергей Меликова проектдинни сметадин документар цIи гьазурун патал такьатар жагъурунин тапшуругъ гана. “Расул Гьамзатован 100 йис тамам жезвай юбилейдихъ галаз алакъалу яз Хунзах райондиз пишкеш ийин ва 2023-йисуз рехъ ремонтна куьтягьин”, — лагьана Сергей Меликова.
Хийир Эмиров
