Чи бубайрихъ са хъсан мисал ава: “Илимдин дувулар туькьуьл хьайитIани, адан емишар ширин жеда”. Къурушрин хуьруьн 2-нумрадин юкьван мектеб агалкьунар аваз акьалтIарай Сельмидин вилик гьи пеше хкядатIа, гьиниз кIелиз фидатIа лугьудай четин месэла акъвазнавай. ГьакI ятIани, ада вичиз рикI алай муаллимвилин пеше хкяда лагьайла, дидеди икI лагьана: “Аку, чан руш, эгер вуна муаллимвилин пеше хкязаватIа, адаз вафалу хьана, тарс гузвай аялар жуван хайибурай яхъ. И ва маса шартIар кьиле тухуз хьайитIа, вакай халис муаллим жеда”. Сельмиди и шартIарал амални авуна, вичин мурад кьилиз акъудна, муаллимни хьана, тербиячини.
1995-йисуз мектеб акьалтIарай Юсупова Сельмидикай ДГПУ-дин филологиядин факультетдин урус чIаланни эдебиятдин отделенидин студентка хьана. Лугьудайвал, йисар акваз-такваз алатна, къе адакай вичин пешедал кьару муаллим хьанва. 2000-йисуз Сельми Хасавюртда авай яшайишдинни реабилитациядин Центрадиз кIвалахал рекье туна. Гьелбетда, ана кIвалахун са акьван регьят крарикай тушир: аялар яшар бегьем тахьанвайбур, диде-бубайрин гуьзчивиликай хкатнавайбур тир. Амма Сельми Медагъаевнади, четинвилеризни килиг тавуна, абурухъ галаз махсус кIвалахар тухвана, вичиз дидеди гайи насигьат рикIел хвена, садрани аялрин арада хайи-тахайвилин тафават тунач, четин аялрихъ галаз кIвалахна, абур дуьз рекьел хкиз алахъна, нетижаярни къазанмишна. Кьве йисалай Сельми Медагъаевна, кар алакьдай, вичин къастунал кIеви, тежриба къачунвай пешекар яз, гьа Центрадин набут аялрин арада кIвалах тухунин рекьяй тербиячивилиз рекье туна. Вичин кIвалахда гьалтзавай четинвилериз дурум гана, намуслудаказ везифаяр кьилиз акъудна, Центрадин дирекциядин, санал кIвалахай юлдашрин патай ада гьуьрмет къазанмишна.
2005-йисуз С.Юсупова хайи хуьруьн 1-нумрадин юкьван мектебдиз социальный педагог яз хтана. Инани адаз четин хьанач, гьикI лагьайтIа, ада тежриба къачунвай. Гьелбетда, хуьруьн мектебда кIелзавай аялрин арадани еке кIвалах тухун лазим тир. Сельми муаллимди вичин чирвилер хкажун патал курсар кIел хъувуна. Ада мектебда кIелзавай 600-дав агакьна аялрин хесетар, яшайишдин шартIар чирун вичин хивез къачуна, абурун кIвалериз фена, диде-бубайрихъ галаз суьгьбетарна, меслятар къалурна, аялар дуьз рекьел хкиз хьана.
С.Юсуповади мектебда, хуьре, районда кьиле тухузвай вири мярекатра иштиракзава. РФ-дин умуми образованидин гьуьрметлу къуллугъчи Сельми муаллимди 2016 ва 2018-йисара Хасавюрт райондин мектебрин арада кьиле тухузвай “Виридалайни хъсан социальный педагог” конкурсда иштиракна, кьве йисузни сад лагьай чкаяр кьуна. Са йисуз республикада кьиле тухвай конкурсдани иштиракна, тафаватлуни хьана.
Социальный педагог мектебдинни хизандин арада сих алакъаяр хуьзвай пешекар я. ГьакI хьайила, абурал ихтибарвални ийизва, четин гьалара авай хизанриз куьмекар гузва, меслятар къалурзава. Сельми муаллимдихъ планар, графикар, куьмек герек тир хизанрин сиягьар, хъсандиз кIвалахунай дипломарни грамотаяр, шагьадатнамаяр ава.
Сельми Медагъаевнадихъ чешнелу хизанни ава. Уьмуьрдин юлдаш, духтур Мегьамед Рашидовичахъ галаз санал кьве хва тербияламишнава. Аялри мектеб къизилдин медалралди акьалтIарна. Фаргьада Саратовда юридический академия, Фаридани ДГМУ-дин лечебный факультет куьтягьна, чпин пешейрай кIвалахзава.
“Чкади инсан ваъ, инсанди чка гуьрчегарзава” гьавайда лугьузвайди туш. Гьахълу гафар я. Абур Сельми муаллимдизни талукь я. Къуй адахъ мадни еке агалкьунар хьурай.
Гьажи Къазиев
