12-мартдиз Ахцегь райондин КьакIарин хуьруьн мискIинда диндин межлис кьиле фена. Му­сурман дин мягькемаруниз, инсанрин арада руьгьдин михьи­ви­лин, мергьяматлувилин, эдеб-ах­лакьдин таблигъат гегьеншаруниз эвер гузвай и мярекатда хуьруьн агьалийрилай гъейри, къунши хуьрерин мискIин­рин имамри, районда “Ас-са­лам” газетдин векил Сулейман Байрамова, агъсакъалар тир Жу­ма Халикьова (Луткун), Шагьбан Омарова (Хуьруьг), Тажидин Ашу­ралиева (Ахцегь) ва масабуру иштиракна.

Диндин межлис Аллагь-Тааладиз лап хуш кар ва фад кьабулдай зурба садакьа я. Аллагьдин малаикар чилерал гьамиша гьа ихьтин шад межлисар авай чкайрихъ къекъвезва. Инсанар ихьтин мярекатра гунагьрикай михьи жезва.

Мярекат Ахцегь районда Да­гъустандин Муфтиятдин векил, КьакIарин хуьруьн мискIиндин имам Узаир Шамилова ачухна ва кьиле тухвана. Ада, и хуьруьн же­мятдик акахьна, намуслувилелди мискIиндин имамвал авур, чкадин жегьил­риз капI ийиз, Къуръан кIелиз чирай авар халкьдин векил, рагьметлу Зикируллагь гьажини рикIел хкана. Къуй вич Аллагьдин рагьметдик кваз хьурай!

Диндин межлисдин сергьятра аваз Хуьруьгрин хуьруьн мис­кIин­дин имам Мугьаммад Се­ли­мо­ва, Цу­ругърин хуьруьн мискIиндин имам Гьамзат гьажиди ва масабуру насигьатдин вязер кIелна.

Гуьгъуьнлай мярекатдин иштиракчийри дуьаяр авуна, Аллагьдивай дуьньяда мусурман уьммет артух, диндал мягькем, Дагъустанда ислягьвал, адалатлувал, Украинада кьиле тухузвай махсус серенжем фад куьтягь хьун тIалабна.

Дашдемир Шерифалиев