Им рази жедай кар  туштIани, политикади чIехи спортдиз чIурукIа таъсирзавай дуьшуьшрин шагьидар чун идалай виликни садрани кьведра хьанач. Алатай вахтарин вакъиаяр, заз чиз, рикIел хкунин лазимвал авач, амма…

Политика спортдик къаришмиш жезвай дуьшуьшрик гила мадни йигинвал акатнава. Алай вацран эхирра апрелдин сифте кьилера азаддаказ, грекринни римлуйрин жуьреда ва дишегьлийри кьуршахар кьунай Венгриядин меркез Будапештда кьиле фидай Европадин чемпионатда ва Болгариядин Пловдив шегьерда 23 йисал къве­далди яшда авайбурун арада кIвенкI­ве­чивилин акъажунра иштиракуникай Россиядин милли команда хкуднава. Идакай Россиядин кьуршахар кьунай спортдин федерациядин (ФСБР) президент Михаил Мамиашвилиди ФСБР-дин сайтда хабар ганва.

— МОК-дин (Международный Олимпийский Комитет) исполкомди алатай ислендиз спортдин федерацийрал Россиядин ва Белоруссиядин милли командаяр акъажунриз ахъай тавун тапшурмишнава. Ам­ма спортсменривай Россиядин ва Белорус­сиядин милли командайрик квачиз, яни ней­тральный атлетар яз, чемпионатда ва акъажунра иштиракиз жедайди алава хъийизва МОК-ди. Чун, федерациядин, Рос­сиядин кьуршахар кьадайбурун хизандин, чи уьлкве Россиядин лайихлувал, на­мус гьи дережада хьайитIани хуьз гьазур я. Амма Россиядин хкянавай командади Будапештда кьиле фидай акъажунра иштиракдач. Чавай чи спортсменрин ва тренеррин уьмуьр хаталувилик кутаз жедач, — къейдзава М.Мамиашвилиди.

Виридаз малум тирвал, и санкцияр алай вахтунда Украинада кьиле тухуниз мажбур хьанвай дяведихъ галаз алакъалу я.

РикIел хкин: винидихъ тIвар кьунвай чемпионатда ва 23 йисал къведалди яшда авайбурун арада кIвенкIвечивилин акъажунра иштиракдай ихтияр-путёвка къазанмишнавайбурун арада азаддаказ кьуршахар кьунай “Иван Ярыгин -2022” международный турнирда Гран-Прияр къазанмишай чи ватанэгьлияр — Даурен Куругълиев (86 кг) ва Шамил Мегьамедовни (65 кг) авай. Мегьамедова мукьвара Туьркиядин Стамбулда кьиле фейи “Яшар Догу” турнирдани, гъалибвал къазанмишуналди, вичин ар­туханвал къалурнай.

Ибурулайни гъейри, мартдиз грекринни римлуйрин жуьреда кьуршахар кьунай Болгариядин Пловдив шегьерда кьиле фидай Европадин кIвенкIвечивилин акъажунра алатай йисан гъалибчи Анвар Аллагьярова иштиракдач. Гьайиф…

Рагнеда Рамалданова