—        Дамарар экъис хьунин (варикозное расширение вен) азар авайла, дамарра тромбар тахьун патал японская акация (адахъ софора, дерево-мотыга ва маса тIва­рарни ава) хъчадикай менфят къачуда. Дарман-къаришма икI гьазурда: хуьрекдин 2 тIуруна авай тумунал (семена) 0,5 л эрекь илична, 2 гьафтеда мичIи чкада хуьда. Ахпа ам холодильникда эцигна, йикъа пуд сеферда, фу нез 30 декьикьа амайла, са истиканда авай чими циз 15 стIал вегьена, хъвада.

—        РикIин  гзаф азарар сагъаруниз таза вергер гзаф хийирлу я. Хуь­рекдин 2 тIуруна авай куьлуь авунвай вергерал 0,5 л ргазвай яд илична, 5 декьикьада зайиф цIал рга­да. Ахпа ам куьзна, йикъа 4 сеферда зур истиканда авайди, фу  нез­ 10 декьикьа амайла, ишлемиш­да­.

—        Кьил тIазвайла, чайдин са тIуруна авай шивитдин тумунал са истиканда авай ргазвай яд илична, 2-3 сятда тада. Ахпа ам куьзна, сут­када са сеферда къаришма вири санлай хъвада.

Мадни, чичIекдикай ни чIу­гуртIа, кьилин тIал секин жеда.

—        ДуркIунра къум авайла, 10 г куьлуь авунвай сельдерейдин дувулрик ва пешерик 100 г вирт какадарна, йикъа пуд сеферда чайдин са тIуруна авайди ишлемишда. Ахпа 10 юкъуз ял яна, мад тикрар хъийида. Сагъарунин вахт пуд гьафте я.

—        Яшлу хьурдавай инсанар он­кологиядик (иллаки хуквадинни ратарин) азарлу хьунин хаталувал гзаф жезва. Эгер къен мукьвал-мукьвал кIеви жез хьайитIа, хуьрек цIуру­рунин органар вахтунда ахтармишун чарасуз я.

—        Туьтуьнин хтунал (щито­видная железа) тIвалар (узелар) хьанвайла, куркума гзаф хийирлу я. Гьар юкъуз­ 1/3 чайдин тIуруна авай куркума са истикандавай рганвай чими циз вегьена хъвада. Сагъарунин вахт пуд гьафте я. Мадни пуд гьафтедин вахтунда гьар юкъуз щитовидкадал кьелен цин компресс эцигун меслят къалурзава.

—        Ивидик холестерин гзаф квайла, агъадихъ галай рецептдикай менфят къачуда: 50 г расторопша хъчадин тумунал 0,5 л эрекь илична, кьве гьафтеда тада. Ахпа фу недалди вилик зур истиканда авай циз 20-25 стIал вегьена, йикъа 3-4 сеферда ишлемишда. И къаришма са вацра ишлемишайдалай гуьгъуьниз холестерин къайдада жеда.

—        Дамарра ивидин гьерекат хкаж хьанвайла, 1 лимон ва 2 апель­син як регъведай машинкадай авадарда, ахпа аниз 0,5 л банкада авай куьлуь авунвай клюква ва шекердин песок алава хъувуна, йикъа 2 сеферда экуьнахъ ва нянихъ хуьрекдин са тIуруна авайди ишле­мишда.

—        Дамарра ивидин гьерекат агъуз аватна, къуватсуз хьанвайла, фу недалди вилик виртIеда рганвай хуьрекдин са тIуруна авай серг неда.

—        РикI кузвайла, еке тушир 2 картуф ракьай яна, миже хкудда. Ахпа адаз рганвай къайи са тIимил яд яна, экуьнахъ, фу нез зур сят амаз, ичIи рикIелай хъвада. 10 юкъуз ихьтин миже ишлемишайтIа, рикI кунин гелни амукьдач.

“Айболит” газетдай.

Гьазурайди — Надият  Велиева