28-февралдиз “Кьурагь район” МР-дин администрацияда райондин идарайрин ва организацийрин регьберрин иштираквал аваз алатнавай гьафтедин нетижаяр кьуниз ва цIийи гьафтеда кьилиз акъудун лазим тир месэлайриз талукьарна (ам, адет яз, гьар — ислендиз кьиле тухузва) совещание хьана. Идакай райондин сайтда хабар ганва. Совещание райондин кьилин заместитель Рамазан Катибова кьиле тухвана. Ам ачухдайла, 8-Мартдин сувариз — дишегьлийрин международный йикъаз — талукь мярекатрин план тукIуьруникай рахана…
Райондин физический культурадин ва жегьилрин крарин рекьяй отделдин начальник Рамиз Рамазанова ял ядай йикъара Дагъустандин Кьиблепатан жегьилрин командайрин арада волейболдай кьиле фейи турнирдин (адакай газетдин 15-чинай, спортдин рубрикадай кIелиз жеда) нетижаяр кьуна.
Совещанидал коронавирусдихъ галаз алакъалу гьаларни веревирдна. ИкI, ЦРБ-дин кьилин духтурдин заместитель Омар Гададова къейд авурвал, районда гьалар пайгардик акатзава. 28-февралдиз авай делилралди, райондин центральный больницадин садакай масадак акатдай азаррин отделенида 3 кас къатканва. Абурукай кьве кас стIалжем хьанвайбур я, садак коронавирус квайди тестикь хьанва. Абурулай гъейри, коронавирусдикди азарлу 3 кас (абурукай кьве кас азарлубурухъ галаз алакъа хьанвайбур я) духтуррин гуьзчивилик кваз кIвалера сагъарзава.
Совещанидал раиж авурвал, коронавирус пайда хьайи вири девирда, азар квани квачни чириз, районда 3334 ахтармишун кьиле тухвана. 432 касдик коронавирус квайди тестикь хьана. Санлай къачурла, районда саки 70 процентдив агакьна агьалийриз (абурукай 12 процент — ревакцинация) коронавирусдиз акси рапар янава.
Чи мухбир
