Чатухъанвал, регъуьхбанвал — ибур ХХI асирда саки амачир, къарибадаказ аквазвай сеняткарвилер я. Акьалтзавай несилдиз абур стIун чидач. Амма са 50-60 йис вилик абур чи халкьдиз яшайишдин метлеб авай лап чарасуз пешеяр тир. Чатухъанризни регъуьхбанриз иллаки еке гьуьрмет авай. ТIебиатдин къуватрихъ — цихъ, цIухъ галаз алакъалу абур, гьелбетда, нелай хьайитIани алакьдачир. Пешекарвилин устадвилелай алава, абуруз руьгьдинни бедендин гужлувал, сабурлувал, мергьяматлувал ва къастунал кIевивал хьтин ерияр хас хьана кIанзавай. Гьавиляй пара дуьшуьшра и пешекарвилер, несилрилай несилрал къвез, давам жезвай. Ингье вичикай ихтилат физвай дуьшуьшдани гьакI я.
Хуьруьгрин хуьре вичин рагьметлу бубайрин кар-ирс, халкьдин надир сеняткарвилер хуьзвай баркаллу чатухъан ва регъуьхбан Жавид авайдакай хабар хьайила, чна адал кьил чIугуна. Мукьувай таниш хьана, адан гъилин кIвалахар акуна, ватанпересвилин фикирриз шерик хьана. Гьар са кардин гъавурда авай хъсан суьгьбетчи ва мугьманперес Ибрагьимов Жавид Мегьарамович, дугъриданни, еке повестдин, романдин персонаж я. Амма чун адакай газетдиз макъала кхьиналди сергьятламиш жеда.
Жавидан чIехи буба Уста Юсуф Самур дереда машгьур, гъиляй гьар са кар къведай зурба устIар тир. Колхозрин девирда Ахцегь, Докъузпара ва Рутул районрин саки вири хуьрерай куьтенар, туьрезар, макъар, арабайрин чархар ва хуьруьн майишатдин маса алатар туькIуьрун патал муьштерияр Хуь-руьгиз Уста Юсуфан чатук къведай. Гуьгъуьнлай, 1970-йисарилай, совхозар тешкилна, тракторар, хуьруьн майишатдин техникадин вири алатар туьквенра пайда хьуникди чатун кIвалахар пара герек амукьнач. Эхь, зурба устIар яз, 1934-1945-йисара Ахцегьа, Хуьруьга, Хъуьлуьда, Цуругъа, Калука, Самур вацIалай вегьена, къени халкьдиз къуллугъзавай рельсерин ракьун муькъверни, Хуьруьга куьгьне кIвалерин ракьун къаварни гьадан гъилерин алакьунар я. Машаллагь!
Жавид Ибрагьимов 1957-йисуз Хуьруьга чатухъан Мегьараман хизанда дидедиз хьана. 1975-йисуз хуьруьн школа акьалтIарна, ам Дагъустандин политехнический институтдик экечIна. 1985-йисуз агалкьунралди вуз куьтягьай жегьил инженер Махачкъалада илимдинни ахтармишунрин “Полёт” институтдиз рекье туна. СССР чкIана, кIвалахзавай институтни агал хьуникди, ам бубадиз устIарвилин куьмекар ийиз хайи хуьруьз хтана. 2000-йисуз Хуьруьгрин школадиз компьютерар гана, абур дуьзмишна кардик кутадай кас авачиз, Жавидаз теклифда. Адан алакьунар ва аялрихъ галаз рафтарвилер акурла, школадин администрацияди адаз муаллимвиле акъвазун теклифда. Гьа икI кьисметдай гьа чIавалай дуьз 15 йисуз, та пенсиядин вахт жедалди, Жавид Мегьарамовича школада информатикадин муаллимвиле кIвалахна.
— ЧIехи буба Уста Юсуф 1966-йисуз рагьметдиз фейила, зун 11 йис хьанвай гада тир, адан къамат, крар хъсандиз рикIел алама. 1964-йисуз чIехи буба азарлу яз, адан чатухъанвилинни регъуьхбанвилин пешеяр Мегьарам бубади давамар хъувуна, гьикI хьи, чIехи бубади пешекарвилин вири сирер гьеле гъвечIи чIавалай адаз чирнавай ва муьштери къалин вахтара абуру санал кIвалахдай. Гьелбетда, гьабурувай зазни чир хьана. Гьа макъамда школада чахъ галай гадайри гележегда лётчикарни космонавтар хьуникай фикирзавайла, зи къаст чатухъанвал авун тир. Зегьем чатук яру ракь бубадин гужлу гъиле-хехинаваз кIавузардал кIутадин кIаник герек алатдиз элкъведай тегьердиз зун гьейранвилелди килигдай. Чатун цел чIугваз, самовардиз цIай вегьез ва алакьдай маса куьмекариз, кIвачин кьилел жедай. “Гила илим, техника вилик фенвайла чатун затIар ише физмач, чан хва, девирдихъ галаз кам-камунаваз фена кIанда”, — лагьана, рагьметлу бубади зун Махачкъалада политехнический институтдик кутунай, — суьгьбетзава Ж.Ибрагьимова.
- Инженер, муаллим ятIани, гъавурда акьазвайвал, рагьметлу бубайрилай амукьнавай “девлетдин” ирсдарвал гила вуна ийизва. Арабир чатук цIайни кутазватIа, хъсан я.
— Эхь, гьелбетда. ХарапI тахьун патал бубайрин алатар ишлемишна кIанда. Дугъри я, са береда чад саки герек къвезмачир. Герек атайла, балкIанралди цан цазвай лежберриз (ахьтинбур чи хуьре кьуд-вад кас авай, гила анжах кьвед ама — Керимни Алаверен) куьтенрин макъар, устIарриз къван хадай кIутаяр, пишкешдин гапурар ва кьериз-цIаруз къведай заказар расдай. 2020-йисалай туристар пайда хьуникди (абуруз регъуьн кIвалах, 100-150 йисан устIархана кIвалахдик кваз акун пара итижлу я) чад саки гьар гьафтеда ачухзава. Мугьманриз къалурун патал, месела, са леэн ва я чукIул гатана, гьабурни чпиз рикIел аламукьдай ядигар яз пишкешзава. Ирс квахь тавун патал за жуван рухвайризни чатухъанвал чирнава. Хуьре кIвалах авачирвиляй исятда Эмирханани Насира Покачи шегьерда нафтIадин буругърал кIвалахзава. Гьа икI за жувалай алакьдайвал бубайрин ирс давамарзава, халкьдин надир сеняткарвилер хуьзва.
- Жавид стха, чаз чида хьи, вуна агъа магьледин куьгьне мискIинда бубайрин регъвни хуьзва.
— Гьамни, чад хьиз, заз бубадилай ирс яз гьалтнавай ядигар я кьван, техуьникай чара авач. Виликрай чи хуьруьн вад магьледани, адет тирвал, вичин кьилди мискIин, регъв, булах ва ким авай. Советрин девирда абуруз фикир хганач, чкIана. Гила, лугьурвал, къванер кIватI хъийидай вахт я. Гьеле заз чидай береда хуьруьн ГЭС ва адан патав целди элкъуьрзавай адетдин регъв кардик квай. 1968-йисуз ГЭС-дихъ галаз, хуьле яд амукь тавуникди, 19-асирдин регъвни агал хьана, ахпа лап чкIана. А чIавуз бубади, “регъв авачир хуьр жедани” лугьуз, пара секинсуз тир ва халкьдин рикI алай тIач авун патал хьайитIани регъв туькIуьр хъувун кьетIна. И мураддалди ада 1974-1975-йисара, къаварни алатна, чкIизвай куьгьне мискIиндин дарамат туькIуьр хъувуна, аниз куьгьне регъуьн къванер хкана, эквер туна, мотордалди элкъуьрдай механизм туькIуьрна. Куьрелди, токдин цIийи регъв кардик кутуна. Чатун устIарханадилай тафаватлу яз, чи регъв инсанри саки гьар юкъуз ишлемишзава: гъуьр, тIач регъвезва (туьквендай къачузвайдини жуван гъилералди регъвезвай къуьлуьн гъуьр сад туш эхир). КIанибуру, маса хуьрерайни атана, фу ва тIач ийидай гъуьр чпи чпиз регъвезва. Алакь тийирбуруз за куьмекзава. И регъв себеб яз, къе хуьруьгвийрин ва пара районэгьлийрин кIвалера тIач ава… Заз чиз, мукьвара куьн бубайрин кардик квай халисан чатук ва я регъве хьанвач, ша, къалурда, — лагьана, Жавида чаз анра рикIел аламукьдай хъсан экскурсия тешкилна.
- Жавид стха, чаз вуна Хуьруьга хейлин вахтунда имамвал авур, мискIинар туькIуьр хъувур, чи девирда Дагъустандай сифте дестедик кваз гьаждал фейи рагьметлу Мегьарам бубадикай са кьадар гегьеншдиз суьгьбетнайтIа, кIандай.
— Зи буба Мегьарам 1924-йисуз Хуьруьга дидедиз хьана (паспортда 1929-йис гьатнава). Хуьре светский мектебдин 4 класс кIелна, ахпа чкадин алимривай диндин чирвилер къачуна. Хуьруьнвийриз ам гьа гъвечIи чIавалай са капIни ахъай тавур, вичин буба Уста Юсуфан кар давамариз, уьмуьрлух халкьдиз къуллугъ авур муъмин кас яз чида. Ачухдиз капI-тIеат ийиз, мискIинар кардик кухтаз эхгечIнамазни, ам, гуя лувар акатна, вичин хушуналди хуьруьн мискIинар туькIуьр хъийиз, медресада хуьруьн аялриз Къуръан кIелиз чириз (100-дав агакьна аялриз Къуръан чирна) эгечIна. Уьмуьрдин кьилин мурад-къаст гьаждал фин яз, ада гьеле Хрущёван девирдилай гьукумдарриз гьаждал фидай ихияр гунин патахъай арзаяр кхьиз хьана. “Вуна мад ахьтин арзаяр кхьимир, я буба, хаталу я”, — лугьуз, чун гьикьван гьавалат жедайтIани, кхьидай. Эхирни анжах садра, 1977-йисуз, СССР-дин Министррин Советдин Председатель А.Н.Косыгиналай жаваб хтана. “Гьуьрметлу Мегьарам, вун михьи динэгьли тирди аквазва. Алай вахтунда Арабрин Сад тир Эмиратрихъ (ОАЭ) галаз чи алакъаяр хъсан тахьуниз килигна, ви тIалабун таъминариз жезвач. Мумкинвал хьанмазди, чна вун хабардарда, аниз рекье твада”, — кхьенвай а чарче. 1992-йисуз Дагъустандай фейи сифте зияратчийрин дестедик кваз буба гьаждал фена.
МискIинар ремонтуникай рахайтIа, хуьруьн куьгьне 5 мискIиндин дараматарни (жуьмя мискIин, гамар храдай фабрика хьайи, райПО-дин туьквен ва гила хуьруьн музей авай дараматар, Малла Алискеран мискIин ва исятда регъв авай чка) ада хсуси кьил кутуналди ва жемят желбуналди туькIуьр хъувуна, хуьрел азандин сес хкана. Жуьмя мискIинда сифте имам Жабаран Мегьамедакай хьана. Ам рагьметдиз фейи 1997-йисалай хуьруьн имамвилин жавабдар везифаярни, алакьдай маса кас авачиз, Мегьарам бубади вичин хивез къачуна. Ам рагьметдиз фейи 2010-йисалай хуьруьн имам Юзбегов Ширинбегакай хьана ва алай вахтунда и кар Сабир Ширинбегова кьиле тухузва.
Дашдемир Шерифалиев