Адет яз, рехъчиди вич физвай рекьин гьакъи я виликамаз билет къачуналди кассадиз, я вич физвай мензилдиз килигна, улакь гьалзавай касдиз гуда. Амма Махачкъаладин “Кьибледин” автостанциядилай Лезгистандин хуьрериз, Мегьарамдхуьруьнни СтIал Сулейманан районриз  хъфизвай маршруткайрилай 50,100 манат гьакъи (налог)  къачузва. Ни? Са ни ятIани, вич гьукуматдин къуллугъчидай кьуна, Дагъустанда чпин гъавурда гьар сад акьан тийидай кье­тIен къайдаяр хуьз алахъзавай лутуйри.

Гьар терефдиз, чкадиз (шегьердиз, районриз, хуьруьз) физвай маршруткаяр акъвазардай махсус чкаяр автостанциядал кхьена къалурни авунва, маршруткайрал чпелни абур физвай терефар кхьенва. Шоферар чебни гьанал акъвазнава. Мегьарамдхуьруьз хъфидай кьвед-пуд кас пассажирар авай маршруткадилайни лутуди 50 манат къачуна. Вучиз? Бес рехъчийриз маршрутка къалурзава, шофердиз пул кIватIзава, автостанция хсусиди я лу­гьуналди, маршруткадин шофердин зегьметдин гьакъи тIимилар­зава. Я туш, рехъчиди мар­шрутка рекье дегишарунин дуьшуьш хьайи­­тIа? Рекьин гьакъи мензилдиз килигайди хьун лазим я кьван. И арада гьина жезва автостанциядилай пул кIватIзавайди?

Мадни. Жемиятдин улакьар (автобусар) Дагъустан Республикадин хуьрерин агьа­лияр патал саки амач. Автобусарни, маршруткаяр хьиз, хсусибур я. Кудай ва ягъла­миш­­дай­ шейэрин (ГСМ) ва я дарманрин къиметар хьиз, мажибарни пенсияр хкаж жез­вач­тIани, гьукуматдин къурулушда ГСМ багьа хьуникди ре­кьерин гьакъиярни хкаж хьун гьахълу я. АкI тахьайла, къуллугъ кьи­лиз­ акъудун патал командировкада авай касдив идарадин патай харж тамамвилелди ах­гакьдач.

Гьа ихьтин сад-вад дуьшуьшдани пассажир вич ва я адан паталай шофер я диспетчердин патав физвайди ва адавай лазим справка къачузвайди, пул кIватIзавайди — ваъ.

Авамвал квадара, лезгияр. Уях хьухь!  Жуван пулунин аявал ая.

А.Гьажимурадов