15-февралдиз СтIал Сулейманан районда Афгъанистандай Советрин кьушунар ахкъу­дайдалай инихъ 33 йис тамам хьуниз талукьарнавай мярекат кьиле фена.

Сифте гаф муниципалитетдин кьил Нари­ман Абдулмуталибова лагьана. Гуьгъуьнлай райондин ветеранрин советдин председатель Ислеман Ризаева мярекатдин иштиракчийриз вичи регьбервал гузвай тешкилатди алатай йисуз тухвай кIвалахдикай ва вилик акъвазнавай месэлайрикай суьгьбетна. “Гьел­бетда, гьар са кIвалах вилик кутун патал ветеранрин советдиз куьмек гузвайди райондин админист­рация я. “Афганистан — наша память и боль” тIвар алаз ктаб акъудунин карда “Умуд” фонду­ни куьмек гана. Заз ихьтин ктаб гьазурдай теклиф гайи Нариман Абдулмуталибоваз, “Умуд” фонд арадал гъайи Имам Яралиеваз сагърай лугьуз кIан­зава. Ктаб чап авун патал зегьмет чIугур “Куьредин хабарар” газетдин ре­дак­ция­дин къуллугъчияр ва кьилдин ксар къейд авуниз лайихлу я”, — лагьана И.Ризаева.

Гуьгъуьнлай винидихъ тIвар кьур ктаб акъу­дуник пай кутурбурув шабагьар вах­кана.­

РикIел хкин, Афгъанистандин вакъиайра СтIал Сулейманан райондай 136 касди иштиракна. Абурукай вад кас — Абдул Саидов, Гьажи Селимов, Гуьлмегьамед Къурбанов, Раидин Османов, Алискер Платов — инсафсуз дяведин цIаяра, гъурбатда телеф хьана. Абурун экуь къаматар чи рикIера ­эбеди я.

Жемиля  Багъишева,

Вини СтIалрин мектебдин муаллим