РФ-дин Президент Владимир Путинан Указдалди (№64, 2022-йисан 17-февраль), чи ватанэгьли, Ахцегь райондин Смугъулрин хуьряй тир Апрель Агъакишиевич Агъакишиеваз къенепатан къуллугъдин генерал-майорвилин чин ганва.
РикIел хкин, А.Агъакишиев 1977-йисан 29-апрелдиз дидедиз хьана. Камышин, Тольятти, Москва шегьерра военный рекьяй чирвилер къачурдалай кьулухъ ада жуьреба-жуьре йисара Камчаткада, Москвада, Тулада ва маса шегьерра къуллугъна.
2020-йисан декабрдин вацралай РФ-дин МЧС-дин Ставрополдин крайда авай кьилин Управленидин начальникдин сад лагьай заместителдин везифаяр тамамарзава. А.Агъакишиев жуьреба-жуьре ведомствойринни государстводин шабагьрин сагьиб я. Абурун арада “Ватандин вилик лайихлувилерай” ордендин II дережадин медални ава.
«Лезги газет»
