1-мартдиз Дагъустандин Кьил Сергей Меликова Донбассда телеф хьайи Россиядин Армиядин офицер, ери-бине Къули райондай тир Нурмегьамед Гьажимегьамедован хизанриз, мукьва-кьилийриз башсагълугъвал гана.
РикIел хкин, Донбассда кьиле физвай махсус операциядин сергьятра аваз жегьил офицерди дяведин подразделение хуьн патал вичин чан къурбанд авуна.
Къейд ийин хьи, Нурмегьамедан буба Энгельс Гьажимегьамедовни къанун-къайда хуьдай органрин векил — полициядин полковник я.
“Россиядин Армиядин офицердин вилик везифа эцигайла, ада ам кьилиз акъудун лазим я. Зи хва Яракьлу Къуватрин офицер тир ва ада Ватан патал чан гана”, — къейдна Э.Гьажимегьамедова.
Телеф хьайи офицердин диде-бубадиз, адан хендедадиз башсагълугъвал гайидалай кьулухъ Сергей Меликов Нурмегьамедан игитвиликай рахана. “Нурмегьамед хьтин кьегьалвилер къалурзавайбур, Ватан хуьзвайбур гьамиша чахъ гала. Абурун экуь къаматар чи рикIерай акъатдач. Куьнни, адан хизан, и четин макъамда куьмек авачиз амукьдач. Ихьтин бедбахтвилер фикир тагана тадай ихтиярар авач. Куь дерт кьезиларун патал жувалай алакьдай вири куьмекар гун за жуван буржи яз гьисабзава”, — лагьана Сергей Меликова, телеф хьанвай офицердин хизандихъ элкъвена.
Къейд ийин хьи, са шумуд югъ идалай вилик Махачкъалада кьиле фейи совещанидал Сергей Меликова Нурмегьамед Гьажимегьамедова халис игитвал авунвайди къейдна. “Чна ахьтин офицеррал дамахзава. Абур неинки са Дагъустандин, гьакIни вири уьлкведин игитар я. Россиядин руководстводи адан кьегьалвал къимет тагана тан тийидайдахъ зун инанмиш я. Виридалайни еке къимет гудайдак умуд кутазва…”, — лагьана Дагъустандин Кьили.
«Лезги газет»
