Духтурвилин пеше виридалайни гьуьрметлуди, герекди, гьа са вахтунда четинди ва жавабдарди тирди, дуьнья завалдик кутунвай коронавирусдин тIугъвал акъатайдалай гуьгъуьниз и пешедин сагьибри чпин уьмуьр хаталувилик кутуна, инсанар къутармишзавайди садани инкардач.
Духтуррин кIвалахдилай инсанри разивал авун, абурун тIварарихъ хуш келимаяр лугьун мадни шадвал кутадай кар я. Мукьвара СтIал Сулейманан райондин Агъа СтIалдилай тир 1-группадин инвалид Рабият Абдурашидовна Гьуьсейхановадилай чи газетдин редакциядиз хуьруьн участковый духтур — терапевт Муминат Омаровадикай макъала кхьин тIалабзавай чар атана.
“Коронавирусдин тIугъвалди кIвалах хейлин артухарнаватIани, Муминат Мегьамедовна мукьвал-мукьвал зи патав къвезва, сагъламвал ахтармишзава… Ам ширин мез авай инсан, тариф авуниз лайихлу пешекар я”, — кхьенвай яшлу дишегьлиди чарче.
Зун гьа юкъуз Агъа СтIалрин хуьруьн амбулаториядиз фена.
1988-йисуз Дагъустандин медицинадин институтдин лечебный факультет акьалтIарна, саки 5 йисуз райондин центральный больницада садакай масадак акатдай азаррин отделенида, 1993-йисалай инихъ, чна винидихъ лагьайвал, Агъа СтIалрин амбулаторияда участковый духтур терапевт яз кIвалахзавай Муминат Мегьамедовна хъсан духтур тирди, ада вичин хиве авай везифаяр жавабдарвал аннамишуналди кьилиз акъудзавайди, адан кIвалахдилай хуьруьнвияр рази тирди заз фадлай хъсандиз чизвай.
Чун чкадал фейила, М.Омаровади дидедихъ галаз иниз атанвай 5-6 йисан яшда авай аялдин сагъламвал ахтармишзавай. Кабинетдин ракIарихъни кьуд кас, нубат кьуна, куьсридал ацукьнавай.
— Коронавирусдик, стIалжемдик, хумадик начагъ яни, тушни чириз амбулаториядиз къвезвай инсанрин кьадар эхиримжи вахтунда артух хьанва, — вичин патав атанвай инсанриз килигайдалай гуьгъуьниз суьгьбетдив эгечIнай Муминат Мегьамедовна. — Амбулаторияда 18 пешекарди кIвалахзава. Абуру Агъа СтIалдал ва Агъа СтIалрин-Къазмайрал яшамиш жезвай 5600 касдиз медицинадин рекьяй къуллугъзава. Хуьрерин агьалийрикай 1600 кас 18 йисал кьван яшда авай аялар ва жаванар (1 йисал кьван яшда авай аялар 57 ава), 1230 кас аялар хадай яшда авай дишегьлияр я. Яшар хьанвай инсанар, аялар ханвай дидеяр, бицIекар хьиз, 1, 2 ва 3-группайрин инвалидарни чи кьетIен гуьзчивилик ква. Чи медработникар и категорийрин инсанрин кIвалериз мукьвал-мукьвал физва, абурун сагъламвал ахтармишзава, лазимвал авайбуруз куьмекар гузва.
Муминат Мегьамедовнади чаз лагьайвал, алатай йисуз кьве хуьре 1306 касди вирусдиз акси рапар яна. И кIвалах алай йисузни давамарзава. ИкI, январдин вацра 450-далай виниз агьалийри рапар яна. Эхиримжи йикъара кьве хуьрени коронавирусдик ва стIалжемдик начагъбурун кьадар тIимил хьанва.
М.Омаровадин хцини духтурвилин пеше хкянава. Дагъустандин мединститут акьалтIарнавай Анвар Омаровича алай вахтунда Махачкъалада ракьун рекьин больницада кIвалахзава.
И четин шартIара инсанрин сагъламвал хуьнин къуллугъда акъвазнавай духтуррин зегьмет тариф авуниз лайихлу я. Къуй абурухъ мягькем сагъвал, хизанра хушбахтлувал хьурай!
Хазран Кьасумов
