Ислягьвал кIани ва ам хуьнин женгинавай инсанар патал Афгъанистан рикIин тIал яз амазма. Саки цIуд йисуз чи уьлкведин аскерри, интернациональный буржи кьилиз акъуддайла, къизгъин женгериз дурум гана. Абурун арада чи республикадай, чи райондайни жегьилар авай. Османов, Селимов, Исрафилов ва масабур гьабурун жергедай я. Рагьмет хьурай чпиз.
Советрин Армиядин кьушунар Ватандиз хтана 33 йис тамам хьанвай лишанлу йикъан гьуьрметдай чи мектебра, аялрин бахчайра мярекатар тешкилна. Аялризни жаванриз ватанпересвилин тербия гунин жигьетдай ихьтин мярекатрин метлеб екеди я. Куьрхуьруьн 2-нумрадин юкьван мектебда кьиле тухвай мярекатда райондин ветеранрин советдин председатель И.Ризаева, “афгъанвияр” тир М.Набиева, Э.Мусаева, муаллимрини аялри иштиракна.
Мектебдин старший пионервожатый Гь.Суругълановади ватанпересвилин тербиядин къуватдикай, и кIвалах мектебда мадни хъсанарунин мураддалди аялрихъ галаз тухузвай серенжемрикай куьрелди суьгьбетна. Кьилди къачуртIа, классрин руководителрин, аялрин иштираквал аваз ва куьмекдалди хъсан кьве альбом гьазурнава. Классра, дегьлизда шикилрин стендар ава.
Мярекатдал вахар тир Самира ва Камила Межведиловайри, Д.Эмирхановади Афгъанистандиз, адан чилел кьиле фейи женгериз, ана чи аскерри къалурай игитвилериз талукь шиирар хуралай кIелна, манияр лагьана. Райондин ветеранрин советдин председатель Ислеман Ризаева, “афгъанвияр” тир Сардархуьруьн юкьван мектебдин директор Эседулагь Мусаева, Мидад Набиева чпи иштиракай женгерикай, акьалтай четинвилерикай, аскервилин дуствиликай ва и крариз къенин школьникри, жегьилри кьетIен фикир гун герек тирдакай суьгьбетна.
Райсудин Набиев
