ЦIийи ктаб
“Лезги газетдин” редакцияди лезги чIал еримлу авунин, акьалтзавай несилрин арада машгьурунин мураддалди кьилиз акъудзавай проектрикай сад “Хайи чIал хуьн” я. Адан сергьятра аваз мукьвара Махачкъалада кардик квай “Лотос” чапханада “Лезги чIал чирин” тIвар алай нубатдин ктаб акъатна. Авторар “Лезги газетдин” кьилин редактор М.Ибрагьимов ва адан заместитель К.Ферзалиев я.
ЦIийи ктабдиз махсус жуьреда гьазурнавай букварь лагьайтIани жеда. Гьавиляй ам гзафни-гзаф аялриз хас ктаб я. Адакай буквардин еринда мектебрани, аялрин бахчайрани, гьа са вахтунда лезги чIал (чIалан сесер) чин тийизвайбурувайни менфят къачуз жеда. Сесер арадал гъидай органар, лезги чIалаз хас кь, тI ва маса сесер акъуддай тегьерар шикилрин ва баянрин куьмекдалди къалурнава. Къейд ийин, ктабда лезги гафарихъ галаз абурун къвалавай урус таржумаярни ганва. Лабиал сесерикайни лезги ва урус чIаларал малуматар ава. Сифтедай гьарфар чирун, гьижаяр кIелун теклифзава. Сесер чир хьунин, кIелзавай гафарин гъавурда акьунин дережа ахтармишун патал ктабдин эхирда кьилдин тапшуругъар ава.
И ва маса бязи кьетIенвилер фикирда кьуртIа, 104 чиникай ибарат яз цIийиз акъатнавай ктаб лезги чIалан илимда сифте кам я. Ктаб рангарин шикилри, ерилу чарчи гуьрчегарнава.
Ктабдин рукописдиз тIвар-ван авай шаир, филологиядин илимрин кандидат Азиз Мирзабегова ва тежрибалу муаллим-методист Агьмедхан Сражидинова виликамаз къимет гана, чпин меслятар къалурна.
РикIел хкин, “Хайи чIал хуьн” проектдин сергьятра аваз сад лагьай ктаб (“100 тапшуругъ”) алатай йисуз чапдай акъатнай.
И ктабар “Лезги газетдин” редакциядай маса къачуз жеда. “Лезги чIал чирин” — 300 манатдай, “100 тапшуругъ” — 200.
Алакъадин нумра: 8-928-560-26 -17.
Лезги Фетгьуьллагь
