Аялар ковиддик азарлу тахьун патал чIехи аялривай духтурри маскаяр алукIунал амал авун, диде-бубайривай гъвечIи аялар инсанар гзаф кIватI хьанвай чкайриз тухун тавун, азардин сифтегьан лишанар малум хьайивалди, участокдин духтурдиз хабар гун тIалабзава.
Мадни, аялрихъ и хаталу азар галукь тавун патал духтурри аялриз витаминар, микроэлементар гузва. Эгер участокдин азарханада дуьз диагноз эцигиз тахьайтIа, абур шегьердин ва я райондин гзаф хилерин больницадиз рекье тун лазим я.
И йикъара Махачкъала шегьердин здравоохраненидин идаради 16-17 йис хьанвай аялриз ковиддиз акси яз “Спутник-М” вакцинадин рапар ягъунин тапшуругъ ганва. Амма, гьайиф хьи, диде-бубайри и кардиз разивал гузвач. Гьелелиг са аялдизни коронавирусдиз акси раб янавач.
Духтурар диде-бубаяр и серенжемдин важиблувилин гъавурда тваз алахъзава. Умуми къуватралди азардин вилик пад кьуна, чи гележегдин несил сагъламди яз чIехи хьун чи виридан пак везифа я.
«Лезги газет»
