Алай вацран эвел кьилерай Орёл шегьерда залан атлетикадай Россиядин Кубок къазанмишун патал акъажунар кьиле фена. Ана Россиядин 33 региондай тир 200-далай виниз спортсменри чпин устадвал къалурна. Уьлкведин Кубок къазанмишайбуруз алай йисан апрелдин вацра Болгариядин меркез София шегьерда кьиле фидай Европадин чемпионатда иштиракдай мумкинвал хьуни акъажунрин кесерлувал генани артухарзавай. И акъажунра вичин ери-бине Докъузпара райондай тир Исмаил Гьажибеговакай 55 кг-дин заланвал авайбурун арада (гила галаз-галаз кьвед лагьай сеферда, алатай йисуз акъажунар Старый Оскол шегьерда кьиле фенай) Кубокдин сагьиб хьана. Ада санлай 216 кг (рывокдай ва толчокдай) хкажна. Нубатдин агалкьун ада Дагъларин уьлкведин агьалийриз бахшзава…
Исмаил Гьажибегов, Дагъустандин патай экъечIуналди, Россиядин Кубок кьвед лагьай сеферда къазанмишнавай сад лагьай дагъустанви штангист я.
РикIел хкин: тренер Гьуьсейхан Закарьяеван гъилик вердишвилер къачузвай чи ватанэгьли (адан 27 йис я) алатай йисан июндиз Ханты-Мансийскда залан атлетикадай кьиле фейи Россиядин чемпионатда 1-чкадиз лайихлу хьана. Дагъустандин залан атлетикадин цIийи тарихда, чи республикадин патай экъечIуналди, Россиядин чемпионвилин тIварцIиз лайихлу хьанвай ам сад лагьай спортсмен я. Вири санлай Исмаила а чIавуз 230 кг (рывокда -100 кг., толчокда — 130 кг) хкажнай. Им адахъ галаз бягьсиниз экъечIай К.Рябыха хкажайдалай 8 кг-дин гзаф тир. Идалди чи ватанэгьлиди Старый Оскол шегьерда Россиядин Кубок патал акъажунра къалурай алакьун мад сеферда тикрар хъувунай…
Амма агалкьунрилай гуьгъуьниз, алатай гатуз, чи ватанэгьлидин кьуьнт операция авун лазим атана. Пешекаррин гафаралди, ихьтин серенжемдилай гуьгъуьниз сагъламвал мягькем хъувун патал тIимил вахт лазим къвезвач. Гьаниз килигна алай йисан Кубок патал акъажунра иштирак авунни шаклувилик квай. Амма чи кьегьалди инални вичин викIегьвал къалурна: важиблу къарар кьабулна ва вичин устадвал мад сеферда тестикьарна.
Малум тирвал, гила И.Гьажибегован мукьвал гележегдин планрик Россиядин ва Европадин чемпионатра иштиракун ква. Виликамаз авай малуматралди, винидихъни чна къейднавайвал, Европадин чемпионат Болгариядин меркезда апрелдиз кьиле тухун пландик квайди тир.Амма уьлкве важиблу акъажунар кьиле тухунин рекьяй четинвилерал расалмиш хьун себеб яз, цIийи тендер малумарна. Ана Албаниядин Тирана шегьер гъалиб хьана. Гила Европадин чемпионат 25-майдилай 3-июндалди ана кьиле фида. Идакай залан атлетикадай Европадин федерациядин вице-президент, Россиядин залан атлетикадин Федерациядин кьил Максим Агатипова хабар гузва.
Важиблуди чемпионат ва маса акъажунар кьиле тухузвай чка туш (кIвале цларини куьмекда лугьудай мисал аватIани), кьилинди хъсан нетижа къалуриз алакьун я. Къуй чи ватанэгьлийрин агалкьунри чун инлай кьулухъ мадни шадаррай!
«Лезги газет»
