Алатай вацран эхирра Москвадин областдин Одинцово шегьерда тхэквондодай (япариз зайифдиз ван къвезвайбурун арада) кьиле фейи Россиядин чемпионатда Дагъустандин хкянавай командадик кваз иштиракай пуд спортсмен — Казбек Латифов (68 кг-дал къведалди), Шамил Исакьов (80 кг-дал къведалди) ва чи ватанэгьли, вичин ери-бине Ахцегьай тир Замир Шихамадов 80 кг-дилай гзаф заланвал авайбурун арада къизилдин медалриз лайихлу хьуналди, Дагъустандин хкянавай командади 1-чка кьуна. И йикъара РД-дин физический культурадин ва спортдин министр Сажид Сажидова тхэквондистриз уьлкведин чемпионатда хъсан нетижаяр (къизилдин 3 медалдилай гъейри, гимишдин — 5 ва гьакьван буьруьнждинбурни) къазанмишун тебрикна…
Министрди мадни къейд авурвал, алай йисуз къизилдин медалар къазанмишнавай пуд спортсменни Бразилияда кьиле фидай Сурдлимпиададиз — спортдин виридалайни кьилин акъажунриз (ибурни Олимпиададин, Паралимпиададин къугъунрин дережадиз барабар акъажунар я, амма япариз зайифдиз ван къвезвай спортсменрин арада) — гьазурвал акунив эгечIда. Дагъустандин спортсменри Сурдлимпиададин амай жуьрейрайни чпин устадвал къалурда.
РикIел хкин: агалкьунар З.Шихамадовахъ идалай вилик йисарани хьана: ада жаванрин арада Россиядин кIвенкIвечивал патал акъажунра галаз-галаз 4 йисуз гъалибвал къазанмишна. Гила адакай галаз-галаз пуд лагьай сеферда уьлкведин виридалайни кьилин акъажунрин гъалибчи хьанва. Саки кьве йис идалай вилик мартдиз Карачаево-Черкесиядин меркез Черкесск шегьерда Россиядин тхэквондодин Союздин президентдин Кубок патал кьиле фейи акъажунра дагъустанвийрикай 9 спортсмен кIвенкIвечи чкайриз лайихлу хьанай. Абурун арада Замирни авай. Ихьтин агалкьунар ада мадни къазанмишнава… Амма лугьун лазим я хьи, уьлкведа акъажунра кIвенкIвечи чкадал, чIехибурун арадани чемпионвилин тIварарин сагьиб са шумудра хьанатIани, са гьихьтин ятIани себебралди Замир Шихамадова икьван чIавалди Сурдлимпиададин къугъунра иштиракнач.
Гила чи ватанэгьлидихъ ихьтин мумкинвал хьанва: винидихъни хабар ганвайвал, майдиз Бразилиядин Кашиас-ду-Сул шегьерда кьиле фидай Сурдлимпиадада Замир Шихамадова 80-далай виниз заланвал авайбурун арада устадвал къалурда. Къуй чи ватанэгьлидихъ спортсмендин уьмуьрда виридалайни кьилинбур тир и акъажунрани еке агалкьунар хьурай!
Рагнеда Рамалданова
