18-февралдиз Дагъустандин Кьил Сергей Меликова РД-дин Халкьдин Собранидиз республикадин Гьукуматдин Председателдин къуллугъдал тайинарун патал Абдулмуслим Абдулмуслимован кандидатура теклифна. РикIел хкин, виликдай и къуллугъдал Абдулпатагь Амирханов алай. 17-февралдиз С.Меликован Указдалди ам и къуллугъдикай азадна.
22-февралдиз Махачкъалада Дагъустандин Халкьдин Собранидин нубатдин сессия кьиле фена. Адан сергьятра аваз РД-дин Гьукуматдин Председателвиле теклифнавай Абдулмуслим Абдулмуслимован кандидатурадин гьакъиндай сессияда иштиракай вири депутатри (80 касди) разивал гана.
Къейд ийин хьи, сессиядал РД-дин Халкьдин Собранидин виликан депутат Марат Алияроваз республикадин парламентдин депутатдин векилвилер хгана. Мурадхан Хидиров рагьметдиз фейидалай кьулухъ (алатай йисан декабрдин вацра) депутатдин мандат азад хьанай. РД-дин Избиркомди, документрал асаслу яз, мандат Марат Алияровав вахкана.
Чи мухбир
