—        Яхун инсанри бедендин заланвал артухарун патал регъвенвай 2-3 кIерецдал са истиканда авай пиво илична, тупIари кьур са тIимил кьел ва чайдин са тIуруна авай вирт алава хъувуна, йикъа са сеферда хъвада. Са вацран вахтунда беден 2-3 килограммдин залан жеда.

—        Хуквадин кислотность агъуз­ хьанвайла, кьурурна куьлуь авун­вай 100 г дамардин пешерал са литр яру чехир илична, кьве гьафтеда къайи ва мичIи чкада эцигда  ва гьар юкъуз юзурда. Ахпа ам сив агалнавай къапуна зайиф цIал, эцигна 10 декьикьада  ргада. Къайи хьайидалай кьулухъ куьзна, фу недалди вилик йикъа пуд сеферда са вацран вахтунда гьар сеферда 50 г ишлемишда.

—        Хуквада хер авайла, картуфар ругунвай яд хуькуьрнавай цIегьрен некIеди хъсандиз куь­мекда. Зур истиканда авай некIедиз 1/3 истиканда авай картуфрин гьалима яда. Ахпа йикъа пуд сеферда­ фу нез 2 сят амайла, ишлемишда.

—        Йикъа ругуд сеферда тIи­мил-тIимил тIуьн рикI азаррикай хуь­дай виридалайни хийирлу къайда я.

—        Ксудалди вилик са истиканда авай бурандин миже ишлеми­шай­тIа, нервияр къайдадик акатда ва хъсан ахварни къведа.

—        Руфуник ял акатнавайла, хуьрекдин са тIуруна авай чIутран цуькверал са истиканда авай ргазвай яд илична, 5 декьикьада зайиф цIал эцигна ргада. Ахпа ам къурна, 1/3 истиканда авайди ишлемишда.

—        Пурнияр квай афнийрин яд дамарра ивидин гьерекат йигин хьу­ни тади гузвайбур патал гзаф хийирлу я. Ам икI гьазурда: ксудалди вилик са банкадиз 2 литр яд цада ва аниз куьлуьз куьткуьннавай афнияр ва са тIимил пурнияр, лимондин са кIус вегьена, холодильникда эцигда. Пакадин юкъуз са истикандин кьатIа авайди хъвада. И къаришма кьве йикъан вахтунда хъвана куьтягьда. Ахпа цIийиди (порция) гьазурда.

—        Дунбукьул (копчик) тIаз­вай­ла, эрекь ва уксус (9%) сад-садак какадарна, 8-10 къат жуна кьежирна, тIазвай чкадал эцигна, целлофандалди ва чими шарфуналди кIевирда. Ихьтин цIуд процедура авурла, регьят хьанвайди гьиссда.

—        Къен кIеви хьанвайла, экуьнахъ са истиканда авай рганвай чими циз чайдин са тIуруна авай лимондин миже ва я са тупIа авай кьел вегьена хъвада. Идалай гуьгъуьниз руфуниз массаж ийида.

—        КIвачер дакIунвайла, петрушка гзаф хийирлу я. Ам икI гьазурда: петрушкадин са кIунчI куьлуьз куьткуьнна, адал 2 истиканда авай ргазвай яд илична, 30 декьикьада тада. Ахпа ам куьзна, йикъа  кьве сеферда, арада са шумуд сят аваз, хъвада.

—        РикIин азарар сагъаруниз таза вергер гзаф хийирлу я. Хуь­рекдин 2 тIуруна авай куьлуь авунвай вергерал 0,5 л ргазвай яд илична, 5 декьикьада зайиф цIал ргада. Ахпа ам куьзна, йикъа 4 сеферда 0,5 истиканда авайди, фу  не­з 10 декьикьа амайла, ишлемишда.

—        Кьил тIазвайла, чайдин са тIу­руна авай шивитдин тумунал са истиканда авай ргазвай яд илична, 2-3 сятда тада. Ахпа ам куьзна, сут­када са сеферда къаришма вири санлай хъвада.

“Айболит” газетдай.

Гьазурайди — Надият  Велиева