Дагъустанда коронавирусдихъ галаз алакъалу гьалар хъсан патахъ дегиш жез гатIуннава: азарханайрив агакьарзавайбурун кьадар къвердавай тIимил жезва. Идакай РД-дин здравоохраненидин министрдин везифаяр вахтуналди тамамарзавай Татьяна Беляевади хабар гана.
Адан гафарай малум хьайивал, эхиримжи гьафтеда регионда азарханайрив агакьзавайбурун кьадардилай анрай, сагъ хъхьана, аххъайзавабур гзаф хьанва. И делилди гьалар хъсан патахъ дегиш жезвайдан гьакъиндай шагьидвалзава. Т.Беляевадин фикирдалди, “омикронди” республикадай “дельта-штамм” “акъудиз куьмек ганва”. Алай вахтунда Дагъустанда коронавирусдик начагъ хьанвайбурун чIехи паюник акатнавайди “омикрон” я. Виликан штаммрилай тафаватлу яз, “омикрон” кьезил къайдада алатзава. Гьа са вахтунда Т.Беляевади къейд авурвал, региондин азарханайрин реанимациядин отделенийра пис гьалда авай азарлубурни ава.
Коронавирус акатзавайбурун кьадар тIимил хьунихъ галаз алакъалу яз, виликдай азар квайбур кьабулай медицинадин са жерге идараяр адетдин къайдадин кIвалахдив эгечI хъийизва.
Алай вахтунда Дагъустанда 1,12 миллион касди коронавирусдиз акси рапар янава. Абурун арада мектебра кIелзавай аяларни ава (чпин яшар 12 йисалай виниз тир).
«Лезги газет»
