15-февралдиз чи машгьур ватанэгьли, Урусатдин ва Дагъустандин халкьдин художник, сейли скульптор Гьейбат Нурагьмедович Гьейбатован 90 йис тамам хьана. Адаз и вакъиа РД-дин культурадин министрдин везифаяр вахтуналди тамамарзавай Зарема Бутаевади, РФ-дин лайихлу художник, РД-дин художникрин Союздин председатель Къурбанали Мегьамедова, РФ-дин лайихлу художник, профессор Абдулзагьир Мусаева, РФ-дин лайихлу артист Хайрулла Къурбанова ва РД-дин культурадин министрдин заместитель Мурад Гьажиева мубаракна.
З.Бутаевади къейд авурвал, Гь.Гьейбатован яратмишунри Дагъларин уьлкведин медениятдин алемда лайихлу чка кьунва ва абурал идалай кьулухъни республикадин вири миллетри дамахда.
Къейд ийин хьи, Гь.Гьейбатова арадал гъанвай монументрин арада, кIвалахдин везифаяр кьилиз акъуддайла, телеф хьайи МВД-дин къуллугъчийриз, хирургар тир Н.И.Пироговазни А.В. Вишневскийдиз, кьве сеферда СССР-дин Игит Амет-Хан Султаназ эцигнавай ва маса гуьмбетар ава.
Гьейбат Гьейбатов вири уьлкведа машгьур хьанвай скульпторрикай сад я. Ада неинки са республикада, Урусатда, гьакIни къецепатан хейлин уьлквейра кьиле фейи выставкайра иштиракна. Искусствойрин институтдин кафедрадин профессор яз, ада изобразительный искусстводин хиле кIвалахдай пешекарар гьазуруник кьетIен пай кутунва.
Магьир устадди хейлин йисара медениятдин хиле чIугунвай зегьмет республикадин Гь.ЦIадасадин тIварунихъ галай, РД-дин Государстводин премийралди, “ДАССР-дин халкьдин художник”, “РФ-дин халкьдин художник” тIварар гуналди къейднава.
“Лезги газетдин” редакциядин коллективдини Гьейбат Нурагьмедовичаз юбилей мубаракзава ва адахъ чандин сагъвални яргъи уьмуьр хьана кIанзава.
«Лезги газет»
