Зак лап гъвечIи чIа­валай са хесет ква.  Хъсан къилихар авай, вичин кеспи чидай, халкьдин, кIва­лахзавай коллективдин арада гьуьрмет авай са касдикай  хабар хьайитIа,  заз адахъ галаз таниш жез,  дуствилин алакъаяр тайинариз кIан жеда.

Са шумуд йис хьана заз зи танишривай СтIал Сулейманан райондин ЦIийихуьруьн юкьван школадин директор тир цмурви  Ягъибегов  Бег  Абдулгьашимович  хъсан муаллим, инсанвилин къилихар авай руководитель я  лугьуз ванер къвез. И школада­ кIвалахна, алай  вахтунда пенсиядиз фенвай химиядин тарсар гайи муаллим Патимат Мегьамедовна чи районда авайбуруз хъсандиз чида. Патимат Мегьамедовна  аварви руш я, лезги гададиз кьисмет хьайи ада лезги хуьре аялриз химиядин тарсар га­на, алай вахтунда ада чIехи классра кIелзавай аялрихъ галаз вичин кIва­ле тарсар тухузва, абур ЕГЭ-диз гьазурзава. Патимат Мегьамедовнадин патав маса хуьрерайни аялар къвезва, ам районда лап хъсан муаллимрикай сад я.

Заз Патимат Мегьамедовнадихъ ва адан уьмуьрдин юлдашдихъ галаз­ ­таниш жез кIанзавай. Гьа икI зун школадиз акъатна ва  мектебдин директор Бег Абдулгьашимовичахъ галаз таниш хьана. Дуьз лагьайтIа,  заз ам садлагьана хуш хьана. Адан ачух чин, мугьман атайла шад хьун, яшдиз­ чIехи касдиз гьуьрмет авун, ихтилат ийидайла вич вине кьун тавун — зун зи патав гвайди халис педагог, вини дережадин пешекар, хъсан руководитель тирдан  гъавурда гьатна.

Ягъибегов Бег Абдулгьашимович 1966-йисан 3-октябрдиз СтIал Сулейманан райондин Цмуррин хуьре дидедиз хьана. Адан буба Абдулгьашим районда тIвар-ван авай маларин духтур, хъсан инсан  я.

Бег Абдулгьашимовича 1983-йисуз Кьасумхуьруьн юкьван школа куьтягьна, ДГПУ-дин къецепатан чIа­ларин факультетдик экечIна. Армиядай хтайла институтда кIелун давамарна, 1990-йисуз ингилис ва немс  чIа­лан тарсар гудай муаллимвилин дип­лом къачуна. Ам СтIал Сулейманан райондин Алкьвадрин юкьван школадиз рекье туна. 1999-2005-йисара  Бег Абдулгьашимовича, къецепатан тарсар гудай муаллим яз,  ЦIийи­хуьруьн юкьван школада кIва­лахна. 2006-йисуз ам школадин директордин заместителвиле тести­кьар­на, са йисалай гьа и школадин ди­ректор хьана, къенин йикъалди кIва­лахзава.

Бег  Абдулгьашимович Дагъустан Республикадин образованидин отличник ва РФ-дин умуми образованидин гьуьрметлу работник я. И тIва­рар адаз вичи ийизвай кIвалахдай хьанвай агалкьунриз килигна ганва.  ЦIийихуьруьн школадин дарамат  1979-йисуз 260 аял патал фикирда кьуна эцигнава. Алай вахтунда школада 679 аялди пуд сменада кIел­за­ва. Мектебдин дарамат куьгьне хьана, электричестводин  линийрин, чим гудай­ къурулушдин ва маса жуьредин кIва­лахар бинедилай  ремонт авуна чкадиз хкана кIанзава.

Школада 101 муаллимди кIва­лах­­­­зава, абурукай 3 РД-дин лайихлу муаллимар я, 16 муаллимдиз “Почетный  работник  общего  образо­вания РФ” тIвар ганва, 21 муаллимдихъ кьилин категория ава. Школада ­кIел­завай 679 аялдикай 130 отличникар я.

1-4-классра кIелзавай 298 аялдиз йи­къа садра чими хуьрек гузва.

2020-2021-кIелунин йисуз мектебда  кIелзавай аялри райондин ва республикадин олимпиадайра хъсан чка­­яр кьуна. 10-классда кIелзавай Та­­гьиров Шамила республикадин олимпиадада математикадай сад ла­гьай чка кьуна, ада гьакIни Сочи шегьерда авай образованидин “Сириус” центрадин курсарани сад ла­гьай­ чка кьуна. Алатай йисуз мектеб акьал­тIарай  29 аялдикай  6 медалистар я, абуру алай вахтунда вузра кIелзава.

Школа куьтягьай выпускникрин арада  физикадинни математикадин илимрин доктор Р.Ш.Бутаев, СтIал Су­лейманан райондин кьил, алим  Н.Ш.Абдулмуталибов, Госдумадин виликан депутат М.М.Абасов, Красноярск ше­гьердин  машгьур  карчи  Р.М.Абасов, Госдумадин депутат хьайи карчи А.Н. Нуьдуьрбегов ва са жерге маса ксар ава.

Бег Абдулгьашимовичаз закайни хабар авай, адаз зун Кьасумхуьруьн телевиденидин передачайрай акунвай. Заз аялрихъ галаз школа куь­тягь­на, Дагъустандай  патаз фейила, абуру чеб гьикI тухвана кIандатIа, гадаяр  военный институтриз кIелиз фин патал вуч авуна кIандатIа, законар чIу­райла кьилел вуч къведатIа, гьада­кай, чи халкьдин тарихдикай ихтилатар авун хуш кар тирди чир хьайила,  школадин директордиз шад хьана.

Ада заз школадиз атун ва аялрихъ галаз и месэлайрай ихтилатар авун теклифна. Чна югъ тайинарна. Зун гъавурда гьатайвал, Бег Абдулгьашимовича школада кIелзавай аялрин тербиядиз ва и кIвалахда ветеранри иштиракуниз еке фикир гузва. Декабрдин вацра зун школадиз атана,  чIехи классра кIелзавай аялар ва гьа классрин руководителар кIватI­на,  винидихъ къалурнавай месэлайрай  ихтилатар авуна. Гьажи Давудан, Ярагъ Мегьамедан, СтIал Сулейманан, Михаил Лезгинцеван, Сергей Меликован,  чи алимрин, игитрин, генералрин уьмуьрдин рекьикай, игитвиликай, чIугунвай зегьметдикай, агалкьунрикай, гьакIни Дагъустандин хал­кьарин арада авай дуствиликай, ичкиди гузвай зияндикайни ихтилатриз аялри дикъетдивди яб гана.

Мярекатдин эхирдай за лап хъсан кIелзавай пуд аялдиз Нариман Иб­ра­гьимован “Инсанвал, адалатлувал ва дуствал патал женгина” ктабар гана.

Бег Абдулгьашимовичахъ галаз суьгьбетдай заз малум хьайивал, школа акьалтIарай медалистрикай, выпускникрикай  бязибур  военный институтриз физва, абур акьалтIарна офицерар хьанвайбурни гзаф ава. И карди зун гзаф шадарна.

Мектебдин муаллимрихъ галаз авур суьгьбетрай зун гъавурда гьатайвал, Бег Абдулгьашимович гзаф са­вадлу, виниз тир пешекарвилин чирвилер авай, адалатлу, намуслу, инсанперес, масадан гъавурда гьатдай­ кас ва руководитель я. Гьич са вахтундани ада муаллимриз гьарайдач, кефи хадач, герек гаф арада маса кас авачиз лугьуда. Къуллугъдин ре­кьяй вичин везифаяр адаз хъсандиз чизва, туькIвейвал кьиле тухузва,  муаллимрин, школада кIел­за­вай аял­рин, абурун диде-бубайрин ва хуьруьнвийрин арада еке гьуьрмет ава.

Б.А.Ягъибегован педагогвилин ви­низ тир дережадикай, алакьунрикай заз райондин образованидин управленидин начальникдин заместитель Къачабег Аминовани разивилелди лагьана.

Бег Абдулгьашимовичан уьмуьр­дин юлдашди СтIал Сулейманан райондин центральный больницадин реанимациядин отделенидин старший медсестравиле кIвалахзава.

ЧIехи гада Тагьира юридический рекьяй пешекарвал  къачунва,  вичин хизанни галаз  Махачкъалада яшамиш жезвай ада  республикадин арбитражный судда кIвалахзава.

Руш Фаидади Тулада медуниверситет куьтягьна, Краснодарда дух­турвиле кIвалахзава. Вичин хизан хьанва. ГъвечIи гада Гьажирамазана Саратовда медакадемияда вад лагьай курсуна кIелзава.

Бег муаллимдихъ галаз таниш хьайила заз чир хьайивал,  адан  диде Агъа Макьарин хуьряй я. Агъа Ма­кьаз хъфидай рехъ Цмур хуьруьн юкьвай физвайди тир. Чи хуьруьнни Цмурин арада сих алакъаяр авай.

Лагьана кIанда,  зун гзаф школайриз фена, бязи школайрин директорар кьве гаф галкIурна рахаз чин тийи­дайбурукай я, абуруз чпин везифаяр, я гьи къайда муаллимрихъ, аялрихъ галаз кIвалах тухвана кIандатIа чизвач. Абуру кIвалахзавай коллективра секинвал жедач, хала-хатурвилелди месэлаяр гьялзавай школада кIел­завай аялрин гьални чIуруди жеда.

Бег муаллим директорвиле тестикьардай вахтунда СтIал Сулейманан райондин образованидин управленидин начальникдин везифаяр   Да­гъустандин халкьдин шаир Майрудин Бабаханова тамамарзавай. Ада заз лагьайвал, Бег Абдулгьашимович а вахтунда районда лап хъсан муаллимрикай сад тир.  Хъсан инсанар тир адан диде-бубади чпин хциз лап  хъсан тербияни ганвай. Гьавиляй директордин къуллугъдал Б.Ягъибегован кандидатурани ада теклифна ва тестикьарна. Бег муаллимдиз и кардикай виликамаз гьатта хабарни авачир. Кадрийрин  ме­сэла Майрудин муаллимди хьиз дуьз гьялиз хьайи­тIа, инанмиш я, мектебрин кIвалахар лап хъсан кьиле  фида.

Идалайни башкъа, хъсан пешекар  тирди вичин кIвалахдалди тестикьарнавай, халкьдин арада  гьуьрмет авай инсанриз  рехъ ачухна, абурун хиве генани жавабдар къуллугъар­ туртIа,  райондизни,  республикадизни, халкьдизни  хийир жедай.

Масуб  Магьмудов,

отставкада авай полковник