Чи жегьилар
2018-йисан зулуз Бегзада Майвудинович Рамазанова Дагъустандин меркезда недай ширинлухар гьазурдай кондитервилин “Ван Лав” тIвар алай студия ачухна. “Ван Лав” — им сад лагьай ва эхирдалди амукьдай кIанивал лагьай чIал я.
“Чна сифтедай Махачкъалада са гъвечIи пIипI ачухуналди, чи кардик кьил кутуна. Гуьгъуьнлай чун гъавурда акьуна хьи, кIвалахар еримлу хьун патал са шегьердин сергьятра акъвазна виже къведач. ИкI, 2020-йисуз чна Астраханда, 2021-йисуз Каспийскда “Ван Лавдин” гъвечIи туьквенар кардик кутуна. Инсанрин шадвал акурла, чна гьазурзавай няметрилай разивал авурла, чак мадни руьгь акатзава”, — ширинлухрин пIипI ачухуникай хабар кьурла, ихтилатна ада заз.
Бегзада 1997-йисуз Махачкъалада дидедиз хьана, ери-бине СтIал Сулейманан райондин Алкьвадрин хуьряй я. Ам вилик эцигай макьсадрив агакьун патал вири жуьредин алахъунар ийидай, мумкинвилерикай менфят къачудай, къастунилай элячI тийидай жегьил я. Ихьтин къилихди инсандин мурадар кьилиз акъатуниз виликди рум гуда.
“Ван Лав” кардик акатдалди вилик Бегзадади еке зегьметар чIугуна, вахтар серфна. Вичи хиве кьазвайвал, кар кьилиз акъатун патал адаз чIехи стхади куьмекарни меслятар гана. Санал къуьн кутунин нетижада мурадди цуьк акъудна. Ада кондитервилин рекьяй еке устадвал ва алакьунар авай ксаривай чирвал, тежриба къачуна.
Заз чир хьайивал, кондитервилин “Ван Лав” студия халкьдин арада машгьур хьанва, ширинлухар гьазурзавайбуруз интернетда гьар юкъуз цIудралди муьштерийри хуш келимаяр кхьизва.
“Санал акъваз тавун, виликди фин, мумкинвилер гегьеншарун — ибур чна кондитервилин студияда фикир гузвай кьилин месэлаяр я. Чи дестеди датIана цIийивилер жагъурзава, чирзава, мадни тIямлу затIар арадал гъизва”, — лугьузва къастунал кIеви Бегзада Рамазанова.
Къуй адан ширинлухрин тIям мадни гегьенш майданрив агакьрай!
К.Ферзалиев
