И йикъара коронавирусдин азардик Дербент шегьерда яшамиш жезвай шаир, ашукь Къариб Алаудинович Къарибов рагьметдиз фена.
Къ.А.Къарибов 1956-йисуз Мегьарамдхуьруьн райондин Гарагърин хуьре дидедиз хьана. Хуьруьн юкьван мектеб акьалтIарна, армиядин жергейра къуллугъна. 1980-йисуз ам Дербент шегьердиз куьч хьана ва вичин уьмуьрдин эхиримжи йикъалди хизанни галаз гьана яшамиш жезвай.
Къариб Къарибова аял чIавалай шиирар кхьизвай. Адан эсерар “Коммунист”, “Коммунизм патал”, “ЦIийи дуьнья”, “Лезги газет”, “Къизил Къусар” газетриз акъатна. Шаирдин къелемдикай 1998-йисуз — “Чуьнгуьр”, 2013-йисуз — “Алай девир” ва 2021-йисуз “Мугьманар я чун” тIварар алай ктабар хкатна.
Къ.Къарибова халкьдин кьилел къвезвай крарикай, Аллагь рикIелай алатнавай имансузрикай, Ватандикай, муьгьуьббатдикай ва маса темайрай кхьизвай. Шаирдин хейлин шиирар манийриз элкъвена, абур манидарри шадвилин мярекатра тамамарзава.
Къейд ийин хьи, Къ.Къарибован эсерар “Лезги газетдин” чинриз мукьвал-мукьвал акъатзавай. Абурун чIалан девлетлувили, образрин къешенгвили, гьар са гафуникай вичин чкадал хийир къачуз алакьуни Къариб Къарибован устадвиликай лугьузва.
“Лезги газетдин” редакциядин коллективди рагьметлудан хизанриз, вири мукьва-кьилийриз башсагълугъвал гузва. Къ.Къарибован экуь къамат чи рикIера амукьда.
