Дагъустан Республикадин здравоохраненидин министерстводин пресс-къуллугъди хабар гузвайвал, лутуйри интернетда цIийи фенд къурмишзава. ИкI тайин кьадар пулдин такьатрихъ гражданин коронавирусдиз акси раб янавай ксарин федеральный Сад тир регистрда тун теклифзавай дуьшуьшар эхиримжи вахтара иллаки гзаф хьанва…
— Лутуйрихъ агъуна, абурув куь гъиле авай пул къакъудиз туналди, квев агакьдай са QR-кодни жедач, идалайни гъейри, куьне абурун гъиле квез талукь (персональный) делиларни твазва. Гуьгъуьнлай лутуйри а делилар масадбуруз маса хгузва. ИкI са сеферда ракьара гьатай ксариз мадни зиян хгун мумкин я, — кхьизва чешмеди.
Ихьтин дуьшуьшрин вилик пад кьуниз талукь малуматда агъадихъ галай къайдайрал кIевелай амал авуниз эвер гузва.
— Интернетдин теклифрихъ агъамир! Гьич са жуьредани а делилар коронавирусдиз акси рапар янавайбурун Сад тир регистрдиз агакьзавайди туш.
— Пулдин такьатар къерехдин инсанрин ва организацийрин тIварарихъ рекье твамир!
— Жувакай и ва я маса делилар (паспортдин серия, нумра, банкарин картайрин нумраяр ва икI мад) садрани раиж ийимир!
«Лезги газет»
