Дагъустандин Гьукуматди регионда къушчивилин хиле хъсан патахъ дегишвилер тун ва какаяр гзаф гьасилун фикирдиз къачунва. И кардиз 2025-йисалди 500 миллион манат пул чара ийида, — хабар гузва РД-дин хуьруьн майишатдин ва суьрсетдин министерстводин пресс-къуллугъди.
“Чна къушчивиле кIвалах рикIивай хъсан патахъ дегишарда, какаяр гзаф арадал гъида ва бройлеррин кьадарни артухарда. 2025-йисалди къушчивилин хел вилик тухун патал 500 миллион манат чара ийида ва ам жуьреба-жуьре хилерив агакьарда. Гъилевай йисуз къушчивилин карханайриз куьмек гун ва абурун производство гегьеншарун патал 25 миллион манат харжда”, — пресс-къуллугъди РД-дин хуьруьн майишатдин ва суьрсетдин министрдин везифаяр вахтуналди тамамарзавай Баттал Батталован гафар гъизва.
Министерстводин регьберди къейд авурвал, Хасавюрт районда кардик квай “Батыр Бройлер” тIвар алай къушчивилин чIехи карханадиз куьмек гуда. Ада Дагъустан бес кьадарда какайралди таъминарун хиве кьунва.
«Лезги газет»
