Мергьяматлувал
Чаз аквазвайвал, алай вахтунда карчивилел машгъул ксари хуьрер, районар, шегьерар аваданламишунин рекье алакьдайвал зегьметар чIугвазва. Садбуру чпин хайи маканра мектебар, спортзалар, мискIинар эцигзава, бязибуру хуьруьз фидай рекьер, куьчеяр аваданламишзава.
Халкь патал къулай шартIар яратмишзавайбурун жергедик Къурушдилай тир Мурад ва Бахтияр Гьажиеварни (стхаяр) акатзава. Абуру гьар йисуз хуьруьнвийриз са къулайвал арадал гъизва. Са йисуз абуру хуьруьн юкьвал алай, инсанар кIватI жедай “Шимин тIул” лугьудай чкадиз чиргъ вегьена. Хеб-мал къекъвезвай и чкада, марфар къвайи вахтунда кьарадин гъиляй инсанривай кIвач эхцигиз жезвачир. Махсус техника кирида кьуна, чпин харжийралди “Кьик” лугьудай участокдай яру чиргъ гъана, хуьруьнвийриз къулайвал авуна.
Са йисуз Къурбанд суварин вахтунда гьар кIвализ са шешел гъуьр, 25 кг дуьгуь, 25 кг шекер, 5 литр чIем, 1 кг чай гана.
Дербент шегьерда яшамиш жезвай Къулиев Фейруза гьар йисуз жегьилрин арада спортдин жуьрейрай акъажунар тухузва. Тафаватлу хьайи жегьилриз пишкешар гун патал стхаяр тир Мурадани Бахтияра 100 агъзур манат пул чара авуна. Амма виридалайни хъсан кIвалах ам я хьи, абуру хуьруьн гьар са магьледа йифен ишигъар туна. Тарарал, шалманрал ишигъдин лампаяр эцигунин кардик Алиханов Андреяни вичин пай кутуна.
Ихьтин къени крар ийизвай Гьажиеври халкьдин патай еке гьуьрмет къазанмишнава. Аллагьди абурун кIвалахрик, суфрайрик авайдалайни артух берекат кутурай! Жемятди абуруз еке алхишар ийизва.
Шихали Багъиров,
Къуруш, Докъузпара район
