Квез чидани?
— Емишар чирдай, ахтармишдай илимдиз “помология” лугьуда.
— Урусрихъ “нянихъ са ич тIуьн бес я — духтур герек жедач” лугьудай мисал ава. И мисал гьахълуди я лагьана тестикьарнавай илимдин делилар ава. Гьакъикъатдани, вахт-вахтунда ич тIуьниз ишлемишуни сагъламвилиз хъсан патахъай таъсирзава.
— Дуьньяда санлай ичерин сортар 7 агъзурдалай гзаф аваз гьисабзава.
— Партахалрик С витамин виридалайни гзаф кваз гьисабзаватIани, гьакъикъатда и витамин кивидик, некьийрик, ананасрик ва маса емишрик адалайни гзаф ква.
— ТIебиатда чаз гьич ванни тахьай вишералди емишар аваз хьун мумкин я.
— Японияда мукьва-кьилийри, дустари сада муькуьдаз савкьатдин еринда емишар гудай адет ава.
— Са анардин къене 1000-1400 кьван цил хьун мумкин я.
— Японияда асирралди бананрин чIунарикай “башофу” тIвар алай надир парча хразвай.
— Эгер ципицI “микроволновкада” эцигайтIа, ам хъиткьинда.
— Къарпузар тахминан 92 процентдин цикай ибарат я. Гьавиляй Африкадин кьурагьвал авай чкайра къарпуз цин чешмедин еринда ишлемишзава.
— Чуьхверрилайни ичерилай чичIекдик тIебиатдин шекер гзаф ква.
— Дарманар ишлемишзавай вахтунда грейпфрут тIуьна виже къведач — кьиникьал гъунин хаталувал ава.
— Са некьидик тахминан 200 цил ква.
— Дуриан — им виридалайни пис ни къведай, амма тIямдиз хъсан емиш я.
- Банан вири дуьньяда машгьур емиш я. Ам калийдалди, клетчаткадалди девлетлу я.
— Антациддин такьатар квайвиляй бананди рикI кудай вахтунда куьмек гуда.
— Салан майвайрин ва емишрин арада виридалайни гзаф ягълу квайди авокадо я.
— Виридалайни ширин емишар хурмаяр (хумравар) яз гьисабзава. Месела, 100 грамм ицIи хурмайрик 65 грамм кьван шекер ква, кьуранвайбурук — гьатта 80 процент.
— Дуьньяда виридалайни еке емиш джекфрут яз гьисабзава. И емишдал “канун” тIварни ала. Какадин кIалуб авай, яцIу чкал алай и емишдин заланвал 35-40 килограммдив агакьун мумкин я. .
— Кивидин ватан Китай яз гьисабзава. Китайвийри и емишдиз “маймундин шефтели” лугьузва.
«Лезги газет»
