И йикъара Махачкъалада, Суракъат Асиятилован тIварунихъ галай спортдин комплексда, 80-дав агакьна спортсменрин иштираквал аваз армрестлингдай республикадин чемпионат кьиле фена. Ана лезги кьегьал рухвайрини чпин гъилерин устадвал ахтармишна. ИкI, Росгвардиядин Дагъустан Республикада авай Управленидин кьилдин батальондин къуллугъчи, полициядин сержант Мегьамедвели Халикьовакай — къуватлу гъилерин сагьибдикай – газетда чна идалай виликни кхьейди я. Мегьамедвелиди и чемпионатда 100 кг-дин заланвал авайбурун арада 1-чка кьуна. Гила ам Дагъустандин чемпионвилин тIварцIиз 10-сеферда лайихлу хьанва. Нубатдин агалкьун чи ватандашди Россиядин Игит Мегьамед Нурбагандован экуь къаматдиз бахшнава…
РикIел хкин: М.Халикьов 1992-йисуз Къизляр райондин Сар-Сар хуьре дидедиз хьана. Ада армрестлингдай — Вирироссиядин, гьакIни грэпплингдай республикадин турнирра са шумудра кIвенкIвечи чкаяр къазанмишна. Ам армрестлингдай спортдин мастер, боксдай спортдин мастервиле кандидат я.
Дагъустандин чемпионвилин тIварцIиз лайихлу хьанвай Равил Тагьирбеговакайни (65 кг-дин заланвал авай спортсменрин арада) чна газетда са шумудра муштулухар гайиди я. Нубатдин акъажунрани ада вич къуватлу гъилерин сагьиб тирди тестикьарна.
Умудлу камар къачузвай чи кьегьал хва Аким Гьамзатовани Дагъустандин чемпионатда (55 кг-дин заланвал авайбурун арада) 1-чка кьуна. РикIел хкин: алатай йисуз Румыниядин меркез Бухарест шегьерда армрестлингдай дуьньядин чемпионат ва 21 йисал къведалди яшара авай жегьилрин арада кIвенкIвечивал патал акъажунар кьиле фенай. И акъажунра Равил Тагьирбегов (60 кг) -1 ва Аким Гьамзатов (55 кг) 2-чкайриз лайихлу хьана.
Чи ватандаш Агьмад Къурбановани (80 кг-дин заланвал авайбурун арада) республикадин чемпионатда 1-чка кьуна. Амни икьван чIавалди вичикай хабар ганвай спортсменрикай сад я. РикIел хкин: 2018-йисуз Туьркиядин Анталья шегьерда армрестлингдай кьиле фейи дуьньядин чемпионатдин финалда (ана дуьньядин 54 уьлкведай тир спортсменри иштиракнай) 75 кг-дал къведалди заланвал авайбурун арада адаз Гуржистандай тир Европадин чемпион, эхиримжи 5 йисуз садрани магълуб тахьай Иракли Зиракашвили кумукьнай.
Мадни са ватандашдикай — Эрзиман Алисултановакай (75 кг-дин заланвал авайбурун арада) Дагъустандин чемпионатдин гимишдин призёр хьана. РикIел хкин: Литвада (2014-йис) кьиле фейи дуьньядин чемпионатда ада гимишдин медаль къазанмишна. Ам гьакIни Россиядин кIвенкIвечивал патал акъажунрин гъалибчи, Европадин, дуьньядин кIвенкIвечивилин акъажунрин призер я.
Винидихъ тIварар кьунвай 4 спортсменни СтIал Сулейманан райондай я. Абуру армрестлингдай дуьньядин ва Европадин чемпион, РФ-дин лайихлу тренер М.Тагьирбегован гъилик чпин устадвал хкажзава.
Дагъустандин чемпионатда гъалибвал къазанмишай спортсменри, республикадин хкянавай командадик кваз, алай йисан мартдиз Санкт-Петербургда армрестлингдай кьиле фидай Россиядин чемпионатда иштиракда.
Рагнеда Рамалданова
