СтIал Сулейманан  райондин администрациядин патав тешкилнавай дяведин, зегьметдин, Яракьлу къуватринни къайдаяр хуьдай органрин ветеранрин Советди (председатель — Ислеман Ризаев) акьалтзавай несилдиз ватанпересвилин тербия гунин жигьетдай гьар йисуз мярекатар тухузва.

Советдин кьиле акъвазнавай И.Ризаев Афгъанистандин женгера лигим хьанвай, тербиядин къадир авай, вичизни  женгерин орденарни медалар авай кас я. Ада бегьерлудаказ кIва­лахзава. Адан алахъунрилай ад­минист­ра­цияди разивал ийизва. Алай йисуз ветеранрин Совет тешкилайдалай инихъ 40 йис жезвайди фикирда кьуналди, тухудай серенжемриз талукь яз план-график туькIуьрнава.

Адан бинедаллаз и йикъара Советдин алай йисан сад лагьай­ заседание хьана. Ана Афгъа­ни­станда кьиле фейи дяведин иштиракчияр тир Загьиров Жаруллагьа, Набиев Мидада, Мусаев Эседулагьа, Манатов Казбека, Савзиханов Шамсудина, Шай­даев Эмира ва масабуру ишти­ракна.­

Ризаев Ислемана Советдин правленидал алай месэлайрикай, рикIе авай крарикай, мукьвара тухудай мярекатрикай куьрелди суьгьбетна.

ЦIийи Мамрач хуьряй тир Ма­натов  Казбека  Герейханован хуьруьн юкьвал алай парк мадни гуьрчегарунин, аваданла­ми­шунин ва и паркуниз уьтквем хцин тIвар гунин месэла къа­ра­гъар­на. Заседанидин иштиракчийри им хъсан фикир тирди, парк шегьредай  физвай виридаз аквазвайди къейдна. Манатов Казбека  вичиз  Магьмутан  хуьре дяведин ветеранрин тIвар­­цIихъ, абур ри­кIел хуьнин лишан яз, ­памятник эцигиз  кIан­завай­дини лагьана. Адан фикиррин тереф правленидин вири членри хвена.­

Анал гьакIни райондин ветеранрикай ктаб акъудиз эгечIна­вайди, аниз герек шикилар, ри­кIел хкунар кIватIзавайдакай ихтилатна. И.Ризаева  Афгъанистандин женгера иштиракай районэгьлийризни, абурун командирризни талукь яз ктаб акъудзавайдакайни малумат гана.

Райсудин  Набиев,

зегьметдин ветеран