Инсанар алай гзаф маса чкайрал хьиз, чун 5-6 итим алай чкадални ихтилат коронавирусдин азардикай, адаз акси рапар ягъуникай кватна. Себебни ам тир хьи, хуьруьн амбулаториядин фельдшер атана, ада рапар ягъ тавунвайбурун арада начагъбур, больницада къаткурзавайбур гзаф тирдакай ихтилатзавай.
— Ваз вуч аватIа чизвани, духтур, — рахана Селим (тIвар дегишарнава), — куьне рапар ягъ лугьуз инсанар бизармир, я азарни авайди туш, я куь рапарикайни куьмек жезвайди туш. Рапар куьне квез пул паталди ягъ лугьузвайди я.
— Я стха, фельдшерди дуьз лугьузва, коронавирусдин азардин хаталувиликай, рапар ягъунин менфятлувиликайни чарасузвиликай телевизоррай алимрини, духтуррини лугьузва, Россиядин Президентдилай, депутатрилай, субъектрин, муниципалитетрин кьилерилай эгечIна, чIехи къуллугърал алай ксари, духтурри азардин аксина рапар янава, абуру хьиз зани кьве раб янава, — кисна акъвазиз хьанач завай. — Раб ягъ, вазни, ви багърийризни куьмек жеда, куьн маса инсанар патални хаталу яз амукьдач.
— Вун районда кIвалахал ала, гьавиляй вуна рабни чара авачиз янава, — хъел кваз лагьана Селима. — Заз Москвада авай гадади зенг авуна, раб ямир лагьанвайди я. Москвада гзафбуру, иллаки больницайра кIвалахзавайбуру, рапар янавайди туш лугьузва…
Я за, я фельдшерди Селимахъ галаз гьуьжет хъувунач. Гъавурда гьатдач ам — и кар чаз якъин хьана. Бубайрин мисалда лугьузвайвал, виридалайни четин кар гъавурда авачир кас гъавурда тун я.
Хуьр я хьи, садаз-сад хъсандиз чизвай. Селимни чи куьчеда яшамиш жезва. ЯхцIурни цIувад йисан яшда авай итим тир Селимавай кьуд классни акьалтIариз хьайиди туш. Урус чIалакай чун гьич раханни тийин, адаз пул гьисабизни чизвайди туш, кIандатIа виш манатдин, кIандатIа яхцIурни цIуд манатдин чар къалура, адавай гьикьван ятIа лугьуз жедач. Амма инсанриз рапар ямир лугьуз ам куьчейрал гьамиша рахаз аквада. Зун аламат жезва: Селим хьтин савадсуз ксарин гафарихъ яб акалзавай инсанарни ава, зун и кардин шагьид хьана са шумудра.
Гьуьрметлу газет кIелзавай юлдашар! Духтуррихъ, пешекаррихъ агъугъ! Коронавирусдин азардин аксина рапар ягъуналди, чавай хаталу азардин вилик пад кьаз жеда.
Хазран Кьасумов
