Агъа СтIалринни Къазмайрин арада СтIал Сулейманан район электроэнергиядалди таъминарзавай гужлу подстанция кардик ква. Анани хъсан инженерри, монтерри, маса пешекарри зегьмет чIугвазва. Абурун арада пешедин гъавурда авай Ильясбегов Абукарни ава (шикилда).
Ам тежрибалу электрик тирди коллективда виридаз чида. Ам неинки вичин кIвал-югъ авай Кьасумхуьруьн, гьакI къунши хуьрерин агьалийризни хъсандиз таниш я. Имни а кардихъ галаз алакъалу я хьи, Абукар вичин жавабдар кIвалах себеб яз ара-ара анриз физва, къайдадикай хкатнавай чкаяр ахтармишзава ва гъиле-гъилди туьхкIуьрзава. И коллективда ада зегьмет чIугваз кьуд лагьай йис я.
Асул гьисабдай адан кIвалах счетчикрихъ галаз алакъалу я, абур ремонтна, ахтармишна чкадал эхцигзава, вичивай тIалабай маса крарани куьмекар гузва. Къе, электрикар гьакIани тIимил авай девирда, ихьтин кас хуьруьн чкада еке куьмекчи жезва. Вичиз теклифай ва подстанциядин руководстводи наряд гана ракъурай чкадиз ам “ваъ” авачиз вахтунда агакьзава ва герек кIвалахар кьилиз акъудзава. Гзаф чкайрай адаз ишлемишдай вахт алатун себеб яз чIурудаказ кIвалахзавай счетчикрин патахъай эвер гузва. Ихьтин дуьшуьшра ада чкадал фена счетчикар, я та-хьайтIа, герек частар цIийибуралди дегишзава. Гьиниз фейитIани, адалай агьалияр рази яз амукьзава. Алатай йисуз устIарди 1000 счетчик туькIуьр хъувуна.
1991-1996- йисара Абукара чилерин комитетда кьилин инженер яз кIвалахна, гуьгъуьнлай адаз “Дагестангазстрой” идарадиз теклифна. КIвалах чидай ва кар алакьдай ада ина 2002-2003-йисара зегьмет чIугуна. Са арада ам Москвадиз акъатна. Уьлкведин меркезда майвайрин базарда, са шумуд йисуз кIвалахна. Виринра Абукара вичин кIвалахдилай инсанар рази авуна, баркалла къазанмишна. Им “Касумкентский” совхозда кIвалахай, Дагъустандин лайихлу багъманчи лагьай тIварцIин сагьиб тир диде Зибейдади ва ВДНХ-дин медалралди руьгьламишнавай дах Идаята адаз ва Ростовда кIвалахзавай стха Насираз, Махачкъалада зегьмет чIугвазвай вах Наримадиз гъвечIи чIавалай гайи дуьз, диб авай тербиядин нетижа я.
Лагьана кIанда, Абукар хизан кIандай къайгъудар бубани я. Уьмуьрдин юлдаш Индирадихъ галаз картар хьтин пуд гада — гележегдин куьмекчияр чIехи авунва. Абуруз дуьз тербия гузва, уьмуьрдин шегьредал акъудзава. Бубадин тIвар алай Идаята исятда Санкт-Петербургда медакадемияда 3-курсуна кIелзава. И вуз кьулан гада Жамалдина яру дипломдалди акьалтIарнава, исятда ординатурада кIелзава. ЧIехи гада Имама ДГУ-да чирвилер къачузва.
Аквазвайвал, бинедилай дуьз тербия гайила, нетижаярни хъсанбур, рикI шадардайбур жезва. Заз абурухъ сагъвал ва мадни агалкьунар хьана кIанзава.
Райсудин Набиев
