И йикъара СтIал Сулейманан райондин Герейханован хуьруьн 1-нумрадин юкьван школада РД-дин лайихлу муаллим, республикадин Кьилин са шумуд грантдин сагьиб Сегьерханум Османовадин регьбервилик кваз школадин 3, 8, 9-классрин аялрихъ галаз тIвар-ван авай шаир, мухбир, публицист, “Лезги газетдин” литературадин отделдин редактор Мердали Жалилован “Бубадин шинель” поэма школада чирун” ктабдай (автор — С.Османова) ачух тарс-презентация тухвана.
Иниз поэмадин автордиз, райондин яратмишдай интеллигенциядин векилриз, муаллимриз теклифнавай. Тарс экрандилай Ватандин ЧIехи дяведин вакъиайрикай кинодин лентер, гьа йисарин бязи документар, поэмадин кьилин игитрин — чи дагъви рухвайрин суьретар къалурунилай, абуруз баянар гунилай гатIунна. Ахпа Сегьерханум Рашидовнади тIвар кьунвай поэмадин кьетIенвилерикай, авторди къарагъарнавай темадин важиблувиликай, акьалтзавай несилриз чи чIехи бубайринни дидейрин игитвилерикай дуьз делилар чирун важиблу тирдакай суьгьбетна. Са низ ятIа чи ЧIехи Гъалибвал, душманрихъ галаз чIугур дявеяр махар хьиз я. Амма чи халкьари къазанмишайди мах ваъ, гьакъикъи Игитвал тирди, гьа адетдин шинелар алайбуру чи Ватандин азадвал, чаз чи къенин югъ, яшамиш жедай мумкинвал хвейиди чир хьун лазим я.
Шаирдин буба Абдулазиз, имид хва Желил, дяведа санал хьайи урус хва, Петр Долгачев, Кацарашвили (гуржи), Берлинда 9-Майдиз рейхстагдин патав гьалтай хуьруьнви — миграгъви Ярали -ибур, махарин игитар хьиз, викIегьдиз душмандин хуруз фена. Рейхстагдин цларал абуру чпин тIварар кхьена…
Гуьгъуьнлай аялри тIвар кьунвай поэмадай сегьнеяр къалурна, ам чIукариз пайна кIелиз, чпин баянар гана.
Тарсунин метлебдикай чпин фикирар иниз атанвай поэмадин авторди, шаир ва гьикаятчи, Афгъандин дяведин иштиракчи Абил Межидова (Сардар Абила) райондин ветеранрин советдин председатель, Афгъандин дяведин иштиракчи Ислеман Ризаева, хуьруьн библиотекадин заведующий Эльза Рустамовади, школадин завуч Эльнара Магьамдаровади, и цIарарин авторди лагьана.
Мугьманри школадиз цIийи ктабар багъишна. Мярекат тешкилай муаллим С.Рашидовнадив шаир С.Абила лезги писателрин Союздин Гьуьрметдин грамота, М. Жалилова хайи чIал ва литература дериндай чирзавай аялрив ва муаллимрив “Лезги газетдин” редакциядин тIварунихъай гьуьрметдин грамотаяр вахкана.
Нарима Балиева, лезги чIалан
ва литературадин муаллим
